मुख्यमंत्र्यांच्या ताफ्यात सोडल्या कडकनाथ कोंबड्या

सांगली ः कडकनाथ कोंबडी घोटाळा प्रकरणांची चौकशी करून आरोपींना तातडीने अटक व शिक्षेच्या मागणीसाठी स्वाभिमानी शेतकरी संघटनेने सोमवारी (ता. १६) मुख्यमंत्री देवेंद्र फडणवीस यांच्या महाजनादेश सांगली जिल्ह्याच्या दौऱ्यात कडकनाथ कोंबड्या सोडल्या.  

इस्लामपूर-पलूस मार्गावरील घोगाव फाट्यावर पोलिस बंदोबस्ताचा ससेमिरा चुकवत स्वाभिमानीचे जिल्हाध्यक्ष महेश खराडे, भारत चौगुले, भागवत जाधव, बाळासाहेब लिंबीकाळे, संदीप शेळके आदी आंदोलकांनी कोबड्या सोडल्या. कार्यकर्त्यांनी या वेळी घोषणाबाजीही केली. विशेष म्हणजे मोठा पोलिस बंदोबस्त, भाजपच्या कार्यकर्त्यांचा वावर असतानाही आंदोलकांनी आपले उद्दिष्ट साध्य केले. स्वाभिमानीने कडकनाथ कोंबडी घोटाळा प्रकरणाची चौकशी आणि आरोपींना अटक करावी, संपूर्ण कर्जमाफी, पूरग्रस्तांना मदत आदी कारणांसाठी आंदोलन केले. 

कडकनाथ कोंबडी फसवणूकप्रकरणी कडकनाथ कोंबडीपालक शेतकरी संघर्ष समितीनेही महाजनादेश यात्रेत कोंबड्या सोडण्याचा इशारा दिला होता. त्याची प्रशासनाने दखल घेऊन जिल्हाधिकाऱ्यांनी रविवारी त्यांच्याशी चर्चा करून मुख्यमंत्र्याशी चर्चेसाठी वेळ उपलब्ध करून देऊ, असे आश्‍वासन दिले होते. त्यानंतरही आज महाजनादेश यात्रेत स्वाभिमानीच्या कार्यकर्त्यांनी कडकनाथ कोंबड्या सोडल्या.  कडकनाथ कोंबडी फसवणूक प्रकरणात शेतकऱ्यांचे कोट्यवधी रुपयांचे नुकसान झाले आहे. अशावेळी शेतकऱ्यांच्या प्रश्‍नांकडे दुर्लक्ष केले जात आहे, असा कडकनाथ कोंबडीपालक शेतकरी संघर्ष समितीचाही आरोप आहे.