काटेपूर्णा प्रकल्प तुडुंब, पाणी साठ्यात वाढ

अकोला ः यंदाच्या मोसमात आत्तापर्यंत वेगवेगळ्या ठिकाणी भिन्न स्वरूपात पाऊस झाला. परंतु गेल्या काही वर्षात पहिल्यांदा जुलै-ऑगस्ट दरम्यान प्रकल्प तुडुंब भरू लागले आहेत. वऱ्हाडातील बहुतांश मोठे प्रकल्प समाधानकारक भरले आहेत. अकोला जिल्ह्यातील काटेपूर्णा हा मोठा प्रकल्प सध्या ९० टक्क्यांपर्यंत पोचला असून त्यात २.७४ टीएमसी साठा तयार झाला आहे. तर लघू प्रकल्पही जोमाने भरू लागल्याने आगामी रब्बी हंगामासाठी ही चांगली परिस्थिती मानली जात आहे.

या विभागात काटेपूर्णा, खडकपूर्णा, वान, नळगंगा, पेनटाकळी हे मोठे प्रकल्प आहेत. यातील बहुतांश प्रकल्पात चांगला पाणी साठा तयार झालेला आहे. केवळ वान या प्रकल्पात अद्यापही पुरेसा साठा झालेला नाही. वान धरणाचे क्षेत्र हे सातपुडा पर्वत रांगांमध्ये आहे. या धरणक्षेत्रात अद्याप जोरदार पाऊस न झाल्याने वानची पातळी ५० टक्क्यांच्या आत आहे.

दुसरीकडे धरणांच्या क्षेत्रात सातत्याने चांगला पाऊस झाल्याने काटेपूर्णा प्रकल्पात वेगाने वाढ होत आहे. बुधवारी (ता. १२) सकाळी हा प्रकल्प ९० टक्के भरला. यात २.७२ टीएमसी साठा तयार झाला. काटेपूर्णा प्रकल्पाचे क्षेत्र प्रामुख्याने वाशीम जिल्ह्यातील भाग आहे. तिकडील पावसाच्या जोरावर सातत्याने वाढ होत आहे. बुलडाणा जिल्ह्यातील खडकपूर्णा प्रकल्पात २.५२ टीएमसी साठा आहे.  पेनटाकळी, नळगंगा प्रकल्पातही साठा सुधारला. तरीही वान प्रमाणेच नळगंगा प्रकल्प क्षेत्रात जोरदार पावसाची प्रतीक्षा कायम आहे.

मध्यम प्रकल्पही भरले वऱ्हाडातील सोनल, एकबुर्जी (जि. वाशीम), मस, उतावळी (जि. बुलडाणा) हे चार मध्यम प्रकल्प १०० टक्के भरले आहेत. तर अकोल्यातील निर्गुणा (६४ टक्के), मोर्णा (८३), वाशीममधील अडाण (७४.२३), बुलडाण्यातील ज्ञानगंगा (८४.९४), पलढग (५१.६६), कोराडी (९१.४५), तोरणा (५९.६) असे भरले आहेत. तर अनेक लघु प्रकल्प ऑगस्टच्या पहिल्याच आठवड्यात भरले असून सांडव्यावरून पाणी वाहत आहे.