केडीसीसीच्या मोबाईल बँकिंग, अद्यावत वेबसाईटचा आज प्रारंभ 

कोल्हापूर : कोल्हापूर जिल्हा मध्यवर्ती सहकारी बँकेच्या मोबाईल बँकिंग सुविधा व अद्ययावत वेबसाईटचा प्रारंभ शुक्रवारी (ता. १) होणार आहे. नाबार्डचे माजी अध्यक्ष डॉ . यशवंतराव थोरात यांच्या हस्ते व ग्रामविकास मंत्री तसेच बँकेचे अध्यक्ष हसन मुश्रीफ यांच्या अध्यक्षतेखाली बँकेच्या केंद्र कार्यालयात सायंकाळी पाच वाजता हा कार्यक्रम होणार आहे. बँकेचे मुख्य कार्यकारी अधिकारी डॉ. ए. बी. माने यांनी प्रसिद्धी पत्रकाद्वारे ही माहिती दिली .  

सद्यःस्थितीत बँकेच्या सर्व ग्राहकांना घरातूनच कोरोना विषाणूच्या संसर्गाचा सामना अधिक प्रभावीपणे करता यावा म्हणून बँकेने KDCC MOBILE BANK हे मोबाईल ॲप तयार केलेले आहे. या ॲपद्वारे जिल्ह्यातील आठ लाखांपेक्षा अधिक ग्राहकांना शाखेत न येता डिजिटल व्यवहार करता येणार आहेत. या सुविधेद्वारे खात्यातील शिल्लक रक्कम तपासणे, खाते उतारा पाहणे, चेकबुक मागणी, मुदतबंद व रिकरिंग ठेव खाते उघडणे, बँकेअंतर्गत इतर खात्यामध्ये रक्कम वर्ग करणे इत्यादी व्यवहार करता येणार आहेत.