खामगाव बाजार समिती बरखास्त; प्रशासक कृपलानींकडे 'चार्ज'

बुलडाणा : जिल्ह्यातील मोठी उलाढाल असलेल्या खामगाव बाजार समितीचे संचालक मंडळ बरखास्त करीत तेथे प्रशासकाची नेमणूक करण्यात आली आहे. कामकाजात अनियमितता तसेच पणन नियमांच्या आदेशांचे पालन न केल्याने तातडीच्या आदेशान्वये जिल्हा उपनिबंधक नानासाहेब चव्हाण यांनी ही बाजार समिती बरखास्तीचे आदेश दिले.  याबाबत मिळालेल्या माहितीनुसार, या बाजार समितीचे प्रभारी सचिव दिलीप देशमुख यांना बाजार समितीतील वजनकाटे अपहारप्रकरणी ६ मे २०१७ रोजी पोलिसांनी अटक केली होती. या वेळी त्यांना न्यायालयाने प्रथम एक दिवसाची व नंतर चार दिवसांची पोलिस कोठडी ठोठावली होती. सलग ४८ तासांपेक्षा अधिक काळ ते पोलीस कोठडीमध्ये असतानाही कृषी उत्पन्न बाजार समितीच्या संचालक मंडळाने त्यांच्याविरुद्ध कर्मचारी सेवानियमातील तरतुदीनुसार कार्यवाही केली नव्हती. त्यांना बाजार समितीच्या सेवेमधून निलंबित करण्याचे टाळले होते.  याप्रकरणी नंदलाल भट्टड यांनी राज्याच्या पणन संचालकांकडे तक्रार करीत दिलीप देशमुख यांना सेवेमधून मुक्त करण्याची विनंती केली होती. या तक्रारीची दखल घेत पणन संचालकांनी बाजार समितीला देशमुख यांच्याविरुद्ध कृषी उत्पन्न खरेदी विक्री नियम १९६७ मधील तरतुदीनुसार कारवाई करून अर्जदार भट्टड व पणन कार्यालयाला त्याचा अहवाल सादर करण्याचे निर्देश दिले. परंतु याबाबत कुठलीच कारवाई करण्यात आली नाही. शिवाय दिलीप देशमुख यांना निलंबित न करता त्यांच्याकडून प्रभारी सचिव पदाचा पदभारही काढला नव्हता. ही बाब सेवानियमातील तरतुदीचा भंग करणारी ठरली. सोबतच सेवाज्येष्ठता यादीतही संचालक मंडळाने घोळ केल्याचा आरोप होता.   नियमानुसार सेवाजेष्ठ कर्मचारी मु. शा. भिसे हे सचिव पदासाठी पात्र असताना त्यांना दिलेला पदभार काढून पुन्हा दिलीप देशमुख यांना बहाल करण्यात आला. अशा प्रकारे बाजार समिती संचालक मंडळाने निर्देशांचे पालन करण्यात कसूर केला. त्यामुळे जिल्हा उपनिबंधकांनी बुधवारी (ता. २४) आदेश काढत खामगाव कृषी उत्पन्न बाजार समितीचे संचालक मंडळ बरखास्त केले. बाजार समितीवर सहायक निबंधक (नांदुरा) एम. ए. कृपलानी यांची प्रशासक म्हणून नियुक्ती केली आहे.  सत्ताकेंद्राला सुरुंग खामगाव बाजार समितीवर काँग्रेसचे माजी आमदार दिलीप सानंदा यांची वर्षानुवर्षे पकड आहे. सध्या ही मोठी संस्था त्यांच्याजवळ होती. मात्र आता बरखास्तीची कारवाई झाल्याने सानंदा पुढचा काय पवित्रा घेतात याबाबत चर्चा सुरू आहेत.