खानदेशात बाजरीचे क्षेत्र वाढणार

जळगाव ः खानदेशात बाजरीचे क्षेत्र यंदा सुमारे दोन ते अडीच हजार हेक्‍टरने वाढणार आहे. यातच बियाण्यांबाबत कृषी विभागाने व्यवस्थित नियोजन न केल्याने हवे ते किंवा अपेक्षित वाण बाजारात उपलब्ध होत नसल्याची स्थिती आहे. कंपन्यांकडून बियाण्याचा पुरवठा सुरळीत सुरू नसल्याचे चित्र आहे.  बाजरी पेरणीची लगबग मागील आठवडाभरापासून खानदेशात सुरू आहे. धुळ्यातील शिरपूर, शिंदखेडा, साक्री, जळगावमधील पारोळा, चाळीसगाव, पाचोरा, जामनेर, चोपडा, जळगाव, नंदुरबारमधील नंदुरबार, नवापूर, शहादा या भागात बाजरीची पेरणी बऱ्यापैकी होईल, असा अंदाज कृषी विभागाने यापूर्वीच व्यक्त केला होता. खानदेशात रब्बीमध्ये दरवर्षी पाच ते सहा हजार हेक्‍टरवर बाजरीची पेरणी केली जाते. यंदा ही पेरणी सुमारे आठ ते साडेआठ हजार हेक्‍टरपर्यंत जाऊ शकते. कारण अनेक शेतकरी कापसाखालील व इतर पिकांखालील रिकाम्या झालेल्या क्षेत्रात बाजरीची पेरणी करीत आहेत. काही शेतकरी कांदेबाग केळीची काढणी ९० टक्के झालेल्या क्षेत्रात बाजरी पेरणी करीत आहेत. चारा व धान्य चांगले उपलब्ध होईल व त्यास दरही चांगले मिळतील, अशी अपेक्षा शेतकऱ्यांना आहे.  बाजरीला मागील हंगामात प्रतिक्विंटल २१०० रुपये दर जळगाव, धुळे व चोपडा येथील बाजारात मिळाला होता. तसेच चाऱ्यालाही दर टिकून होते. यंदा खरिपात पिकांचे नुकसान झाल्याने चारा हवा तेवढा नाही. यामुळे चाऱ्याची साठवणूक पुढे महाग होऊ शकते. यासाठीदेखील अनेक शेतकरी बाजरी पेरणी करीत आहेत. सध्या धुळे, साक्री, शिंदखेडा या भागातील पेरणी ६० टक्‍क्‍यांवर झाली आहे. तर चोपडा, जळगाव, शहादा या भागातील पेरणी सुरू आहे. बियाण्यासाठी शेतकऱ्यांना बाजार किंवा खासगी कंपन्यांवर अवलंबून राहावे लागत आहे. यातच हव्या त्या किंवा अपेक्षित कंपनीचे वाण बाजारात मिळत नसल्याची स्थिती आहे. जळगाव, चोपडा, शहादा येथील बाजारात वाणांचा तुटवडा असल्याचे शेतकऱ्यांचे म्हणणे आहे.