खानदेशात कांदेबाग केळीची लागवड निम्मीच

जळगाव ः  खानदेशात कांदेबाग केळी लागवडीला मध्यंतरी वेग नव्हता. यामुळे लागवड अपेक्षेच्या तुलनेत निम्मीच झाली आहे. यंदा सुमारे १३ ते १४ हजार हेक्टरवर लागवड अपेक्षित आहे. 

ऑक्टोबरमध्ये लागवड पूर्ण होते. पण, यंदा लागवड पूर्ण झालेली नाही. मध्यंतरी पावसामुळे ही लागवड रखडली. कारण, लागवडीसाठी वाफसा हवा असतो. कांदेबाग केळीसाठी अधिकाधिक शेतकरी कंदांचा उपयोग करतात. अपवादानेच रोपांचा उपयोग या लागवडीसाठी खाानदेशात केला जातो. कंद जुनारी किंवा कापणी पूर्ण झालेल्या केळी बागांमधून काढून त्यांची लागवड करावी लागते. पण, पावसामुळे कंद काढणे, वाहतूक आदी कार्यवाही बंद होती. पण वातावरण कोरडे होताच या कामाला वेग आला आहे. 

कांदेबाग केळीची लागवड निम्मीच झाली आहे. ही लागवड या आठवड्यात वेग घेईल. कांदेबाग केळीची लागवड जळगाव जिल्ह्यात चोपडा, जळगाव, पाचोरा-भडगाव, जामनेर, काही प्रमाणात यावलमध्ये आणि धुळ्यातील शिरपूर तालुक्यात केली जाते.

एकट्या जळगाव जिल्ह्यात साडेआठ ते नऊ हजार हेक्टरवर कांदेबाग केळी लागवड अपेक्षित आहे. हलक्या, काळ्या कसदार जमिनीत लागवड केली जाते. पूर्वमशागतही अनेक भागात ठप्प झाली होती. पूर्वमशागत पूर्ण करून लागलीच लागवड केली जाते. यंदा लागवड काहीशी लांबणार आहे. 

मजूरटंचाईचा प्रश्‍न

यंदा नोव्हेंबरमध्येही लागवड सुरू राहील. लागवडीसाठी कंदांची निवड सर्व तोटे, फायदे लक्षात घेवून शेतकरी करीत आहेत. चोपडा, जळगाव भागातील शेतकरी रावेर, नंदुरबारमधील शहादा, तळोदा, औरंगाबादमधील कन्नड, सोयगाव भागातून कंद आणत आहेत. वाहतुकीसह प्रतिकंद पाच रुपये दर पडत आहे. यंदा वाहतूक खर्च व कंद काढण्याची मजुरी अधिक लागत आहे. मजूरटंचाईदेखील आहे, असे शेतकऱ्यांचे म्हणणे आहे.