दीर्घ खंडामुळे नांदेड, परभणी, हिंगोलीत खरीप धोक्यात

नांदेड ः नांदेड, परभणी, हिंगोली जिल्ह्यात पावसाच्या दीर्घ खंडामुळे (ड्रायस्पेल) संवेदनशील अवस्थेतील खरीप पिकांना पाण्याचा ताण बसला आहे. कडक उन्ह पडत असल्यामुळे उभी पिके होरपळून जात आहेत. मूग, उडदा पाठोपाठ सोयाबीन, ज्वारी, बाजरी, कपाशी आदी पिकांच्या उताऱ्यात मोठी घट येणार आहे.

पावसाचा खंड काळ वाढत चालल्याने खरीप हंगामावर संक्रात आली आहे. हाता तोंडाशी आलेला घास निसर्गाने हिरावून घेतल्यामुळे शेतकरी गतवर्षीप्रमाणेच यंदाही संकटाच्या फेऱ्यात सापडले आहेत.

नांदेड, परभणी, हिंगोली जिल्ह्यातील शेतकऱ्यांनी यंदा कपाशी ऐवजी सोयाबीनला प्राधान्य दिले. या तीन जिल्ह्यात सोयाबीनचा पेरा सर्वसाधारण क्षेत्राच्या दीड पटीहून अधिक वाढला. सोयाबीनचे पीक वाढीच्या अवस्थेत असतांना जुलै-आॅगस्टमध्ये पडलेल्या दीर्घ खंडामुळे पाण्याचा ताण बसला. 

गेल्या २० ते २५ दिवसांपासून पाऊस गायब झाल्याने शेंगात दाणे भरण्याच्या अवस्थेतील सोयाबीनचे पीक होरपळून गेले. पाते, फुले, बोंडे भरण्याच्या अवस्थेतील कपाशीचे पीक अजून काही काळ तग धरील; परंतु बोंडे परिपक्व होण्यासाठी पाणी नसल्याने उत्पादन घटणार आहेत. या तीन जिल्ह्यातील सर्वच तालुक्यातील पिकांना पाण्याचा ताण बसला आहे.

आमच्या भागात सुरवातीपासूनच कमी पाऊस आहे. पाऊस गायब झाल्याने सोयाबीन, कापूस वाळून गेले आहे. काही दिवसांपूर्वी पाऊस आला होता. परंतु, त्याने झाडाखालची जमीनदेखील भिजली नाही. यंदा सर्वच पिकांच्या उताऱ्यात ५० टक्क्यांहून जास्त घट येणार आहे. - सदाशिव पाटील,  शेतकरी, हणेगांव, ता. देगलूर, जि. नांदेड