सांगली : सव्वातीन लाख हेक्‍टरवर खरीप नियोजन

सांगली : यंदा वळवाच्या पावसाने दडी मारली. मॉन्सूनही वेळेत दाखल होणार की नाही, याकडे शेतकऱ्यांचे लक्ष आहे. शेतकऱ्यांचे खरीप हंगामाकडे लक्ष लागले आहे. जिल्ह्यात यंदा खरिपासाठीचे क्षेत्र ३ लाख ४८ हजार हेक्‍टरवर असेल. त्या दृष्टीने कृषी विभागातर्फे तयारी सुरू आहे. 

ज्वारीचे सर्वाधिक ६० हजार ८७२ हेक्‍टर क्षेत्र असून, त्यापाठोपाठ सोयाबीनचा पेरा ५७ हजार १६१ हेक्‍टरवर होईल. हंगामासाठी सव्वा लाख टन खतपुरवठा अपेक्षित आहे. ४७ हजार क्विंटल बियाण्यांची मागणी नोंदविण्यात आली आहे. सरकारी आणि खासगी कंपन्यांकडून खते आणि बियाण्यांचा पुरवठा सुरू आहे. खरिपात खते व बियाण्यांची टंचाई निर्माण होणार नाही, याकडेही प्रशासनाचे लक्ष आहे. 

जत, आटपाडी, खानापूर, तासगाव, कवठेमहांकाळ, मिरज पूर्व भागात ज्वारीचे उत्पादन घेतले जाते. ज्वारीचे ६० हजार ८७२ हेक्‍टर क्षेत्र पेरणीसाठी उपलब्ध आहे. या ठिकाणी बाजरीचेही उत्पन्न घेतले जाते. ४३ हजार १९२ हेक्‍टर क्षेत्र उपलब्ध आहे. पेरणी पावसावर अवलंबून असल्याने वेळेत मॉन्सून दाखल झाल्यास शंभर टक्के पेरा पूर्ण होण्याच्या आशा आहेत. 

शिराळा तालुक्‍याला पावसाचे प्रमाण जास्त असते. येथे भाताचे उत्पादन मोठ्या प्रमाणात घेतात. या वर्षी १७ हजार ३८७ हेक्‍टर क्षेत्र उपलब्ध असून, उन्हाळी पावसानंतर धूळवाफेवर पेरणी केली जाते. मागील काही वर्षांत मक्‍याचे क्षेत्रही वाढले आहे. चालू वर्षीही ३० हजार २९८ हेक्‍टरवर मक्‍याची पेरणी होण्याचा अंदाज आहे.

भाताचे साडेपाच हजार क्विंटल बियाण्यांचे कृषी विभागाने नियोजन केले. त्यापैकी सध्या चाळीस टक्के बियाणे उपलब्ध आहे. जत, आटपाडी, कवठेमहांकाळ, तासगाव, मिरज पूर्व, खानापूर तालुक्‍यांत तूर, मूग, उडीद, भुईमुगाच्या आदी पेरणीचे क्षेत्र आहे. त्यादृष्टीने येथे कडधान्याचे बियाणे उपलब्ध करण्यात येणार आहे. 

खरिपाचे पीकनिहाय क्षेत्र