नांदेड जिल्ह्यातील शेतकऱ्यांना खरीप पीकविमा परतावा मंजूर

नांदेड ः जिल्ह्यात पंतप्रधान खरीप पीकविमा योजना २०१७ मध्ये सहभागी झालेल्या ९ लाख ६६ हजार १०७ शेतकऱ्यांपैकी ६ लाख ३ हजार ८८७ शेतकऱ्यांना मूग, उडीद, तूर, सोयाबीन, कापूस, तीळ, ज्वारी या सात पिकांच्या नुकसानभरपाईबद्दल ४५३ कोटी ८८ लाख १८ हजार ५७७  रुपये विमा परतावा मंजूर करण्यात आला. सोयाबीनच्या नुकसानभरपाईबद्दल सर्वाधिक २ लाख ८२ हजार २४७ शेतकऱ्यांना ३५७ कोटी ६० लाख ५२ हजार ४०६ रुपये परतावा मंजूर करण्यात आला आहे.

२०१७ मध्ये कृषी विभागाने पंतप्रधान पीकविमा योजनेबाबत जनजागृती केल्यामुळे विहित मुदतीत जिल्ह्यातील शेतकऱ्यांनी ९ लाख ६६ हजार १०७ विमा प्रस्ताव दाखल करत ३७ कोटी ५४ लाख रुपये विमा हप्ता भरणा केला होता. मूग, उडीद, तूर, सोयाबीन, ज्वारी, बाजरी, तीळ, भात, कपाशी आदी मिळून एकूण ४ लाख ५ हजार ५०० हेक्टरवरील पिकांसाठी १३८७ कोटी ८६ लाख ९५ हजार रुपयांचे विमा संरक्षण घेतले होते. गतवर्षी खरीप हंगामात जून ते आॅक्टोबर कालावधीत तब्बल ४९ दिवस पावसाचा खंड पडला होता. त्यामुळे अल्प कालावधीत येणाऱ्या मूग, उडीद, सोयाबीन, ज्वारी, तीळ आदी तसेच दीर्घ कालवधीत येणाऱ्या तूर, कापूस पिकांचे मोठे नुकसान झाले होते. परंतु विमा कंपनीने सात पिकांच्या नुकसानीबद्दल धर्माबाद वगळता अन्य १५ तालुक्यातील ६ लाख ३ हजार ८८७ शेतकऱ्यांना ४५३ कोटी ८८ लाख रुपये विमा परतावा मंजूर केला आहे. विमा योजनेत सहभागी शेतकऱ्यांची संख्या ९ लाख ६६ हजार १०७ असतांना पोटर्लवर मात्र शेतकरी संख्या ८ लाख ५३ हजार २१८ एवढी दर्शविण्यात आली आहे. याबाबत तपशीलवार माहिती घेतली जात आहे, असे कृषी विभागाच्या सूत्रांनी सांगितले.