पुणे : पावसाअभावी खरीप पेरण्या खोळंबल्या

पुणे ः जूनचा अर्धा महिना ओलांडला तरी अजूनही पावसाने दमदार हजेरी लावलेली नाही. यामुळे पुणे विभागात खरीप पेरण्या खोळंबल्या आहेत. येत्या आठवड्यात पाऊस न झाल्यास पेरणीच्या क्षेत्रात घट होऊन शेतकरी अडचणीत येण्याची शक्यता आहे. 

मागील आठवड्यात पुणे, नगर आणि सोलापूर जिल्ह्याच्या काही भागात हलका ते मध्यम स्वरूपाचा पूर्वमोसमी पाऊस झाला होता. त्यामुळे शेतकऱ्यांनी काही प्रमाणात खरीपाची तयारी सुरू केली होती. अनेक भागात शेतकऱ्यांनी पेरणीसाठी शेत नांगरणी व वखरणी करून ठेवले आहे. मात्र, गेल्या पाच ते सहा दिवसांपासून पावसाने उघडीप दिली आहे. त्यामुळे शेतकऱ्यांनी पुन्हा शेतीचे कामे थांबल्याची स्थिती आहे.  

पुणे जिल्ह्याच्या पश्चिमेकडील भोर, वेल्हा, मावळ, मुळशी उत्तरेकडील खेड, जुन्नर, आंबेगाव, तर नगर जिल्हातील अकोले तालुक्यात प्रामुख्याने भाताची लागवड केली जाते. त्यासाठी कृषी विभागाकडून बियाणांचा पुरवठा कृषी विभागाने केला आहे. भात लागवडीसाठी दरवर्षी मोठ्या प्रमाणात भात रोपवाटिका तयार होतात. यंदाही मोठ्या प्रमाणात भात रोपवाटिका मोठ्या प्रमाणात होणार असल्याची शक्यता आहे. मात्र, जूनचे महिन्याचे पंधरा दिवस ओलांडले तरी पुरेसा पाऊस झालेला नाही. गेल्या पाच ते सहा दिवसापासून वातावरणात होत असलेल्या बदलामुळे शेतकरी पावसाची वाट पाहत असले तरी पुरेसा पाऊस झाल्याशिवाय रोपवाटिकेची कामे हातात घ्यायला नको, अशा मनस्थितीत शेतकरी आहेत. 

उर्वरित सोलापूर, पुणे आणि नगर जिल्ह्यातील भात पट्यातील तालुके वगळता शेतकऱ्यांनी चांगला पाऊस होईल या अपेक्षेने खते, बियाणांची खरेदी सुरू केली असल्याचे दिसून येते. मात्र, पावसाने अजूनही हजेरी न लावल्याने खते, बियाणे तसेच पडून असल्याचे चित्र आहे. गेल्या वर्षी एक ते वीस जून या काळात नगर जिल्ह्यात ४४.३ मिलिमीटर, पुणे जिल्ह्यामध्ये ६६.५ मिलिमीटर तर सोलापूर जिल्ह्यात ४३.० मिलिमीटर पाऊस झाला होता. त्यामुळे याच काळात सरासरीच्या सात लाख ८८ हजार ४८० हेक्टरपैकी ९ हजार ११० हेक्टरवर पेरणी झाली होती. मात्र, चालू वर्षी काही ठिकाणी पाऊस पडला असला तरी खरिपाच्या पेरण्या अजूनही झालेल्या नाहीत.

पुणे विभागातील खरिपाचे पीकनिहाय सरासरी क्षेत्र, हेक्टरमध्ये  भात ८१,३९०, खरीप ज्वारी ७,४५०, बाजरी २,३६,२५०, रागी १३,६८०, मका ७८,४६०, इतर खरीप तृणधान्ये १८,३३०, तूर ३९,६३०, मूग १८,९६०, उडीद १६,१२०, इतर खरीप कडधान्ये ३१,२६०, भूईमूग ४७,८४०, तीळ २५८०, कारळे ६१८०, सुर्यफूल ९१९०, सोयाबीन ६८९३०, इतर तेलबिया ५८१०