राज्यात खरिपाच्या पेरण्या ८३ टक्क्यांवर

पुणे  : कोकणाच्या काही भागांत अतिवृष्टीने पिकांचे नुकसान झालेले आहे. कोकणात गेल्या २४ तासांत १४० मिलिमीटर पावसाची नोंद झाली. राज्यात १ जून  ते १९ जुलैपर्यंत सरासरी ४१० मिमी पाऊस अपेक्षित असताना प्रत्यक्ष पाऊस ४८८ मिमी पाऊस झालेला आहे. म्हणजेच ११९ टक्के पावसाची नोंद झाली आहे. अर्थात, नाशिक (७७ टक्के) व पुणे (८५ टक्के) विभागात अद्यापही कमी पाऊस आहे.  कृषी खात्याच्या म्हणण्यानुसार, सध्या सुरू असलेला पाऊस एकूण हंगामासाठी दिलासादायक ठरतो आहे.  यामुळे काही भागांत रखडलेल्या पेरण्या आटोपतील. खरिपाचा अजूनही २० टक्के पेरा बाकी आहे. दमदार पावसामुळे भाताच्या पुनर्लागणीची कामे वेगाने पुढे सरकतील. राज्यात भाताखाली सरासरी १५ लाख हेक्टर क्षेत्र आहे. मात्र लागण साडेपाच लाख हेक्टरपर्यंत झालेली आहे. म्हणजेच अजून ७० टक्के लागण बाकी असल्यामुळे भातासाठी भरपूर पावसाची गरज आहे. भातपट्ट्यात अनेक ठिकाणी अद्याप लागवड सुरू आहे.

ज्वारी, बाजरीची जागा घेतली सोयाबीनने राज्यात सोयाबीनचे क्षेत्र वाढत असताना त्या बदल्यात काही भागांमध्ये कपाशीचा पेरा घटतो आहे. मात्र मराठवाड्यातील पारंपरिक खरीप ज्वारी व बाजरीचे क्षेत्र यंदा घटण्याची चिन्हे आहेत. या दोन्ही पिकांची जागा काही गावांमध्ये हळूहळू सोयाबीन घेऊ पाहत असल्याचे दिसून येते,’’ असे निरीक्षण राज्याच्या कृषी विस्तार व प्रशिक्षण विभागाचे संचालक विकास पाटील यांनी नोंदविले.  पाटील म्हणाले, ‘‘राज्याचा खरीप पेरा आता अंतिम टप्प्यात आले. येत्या दहा दिवसांत राज्यभर धानाची पुनर्लागण संपुष्टात येईल. सर्वत्र पाऊस चांगला असल्यामुळे सध्या तरी हंगामाची स्थिती चांगली दिसते आहे. सोयाबीनला गेल्या हंगामात चांगला दर मिळाल्यामुळे राज्यातील शेतकऱ्यांनी यंदा सोयाबीनवर जास्त लक्ष केंद्रित केलेले आहे. त्यामुळे इतर कोणत्याही पिकापेक्षा यंदा सोयाबीनचा सर्वाधिक पेरा राज्यात राहील.