अकोल्यात खरिपाची ६३ टक्क्यांवर पेरणी

अकोला  ः पावसाअभावी गेले काही दिवस रखडलेल्या पेरण्यांना या अाठवड्यात पुनरागमन झालेल्या पावसामुळे सुरवात झाली अाहे. पाऊस झाल्याने पेरण्यांचा वेग वाढला असून, जिल्ह्यात ६३ टक्क्यांपेक्षा अधिक क्षेत्र लागवडीखाली अाले अाहे. या महिन्यात संपूर्ण क्षेत्रावर पेरणी पूर्ण होण्याचा अंदाज अाहे.

जिल्ह्यात जून महिन्यात मृगात पाऊस झाल्याने अकोला, पातूर, बार्शिकाटळी, मूर्तिजापूर, अकोट या तालुक्यांमध्ये पेरण्या सुरू झाल्या होत्या. परंतु पावसात खंड अाल्यामुळे पेरण्यांचे काम थांबले होते. अाता या अाठवड्यात पावसाचे पुनरागमन झाल्याने शेतकऱ्यांनी पेरणीचे काम सुरू केले अाहे. अातापर्यंत तीन लाख ४ हजार ९९३ हेक्टरवर पेरणी अाटोपली अाहे. या लागवडीपैकी ५० टक्क्यांपेक्षा अधिक क्षेत्रात सोयाबीन पिकालाच प्राधान्य दिले गेले अाहे. उर्वरित क्षेत्रापैकी बहुतांश हेक्टरवर सोयाबीनचीच लागवड होण्याची अपेक्षा अाहे.       

या हंगामात सोयाबीनला भाव कमी मिळाल्याने व तुलनेने कपाशीला चांगला भाव राहिल्याने बोंडअळीचे संकट येऊनही शेतकरी कपाशीकडे पाठ फिरवणार नाहीत, अशी अपेक्षा होती. परंतु पावसाला झालेला विलंब, बोंडअळीचे संकट, उत्पादन खर्च यामुळे शेतकऱ्यांनी सोयाबीनला पसंती दिली अाहे. कपाशीची लागवड ७८,५७५ हेक्टरपर्यंत झाली. अागामी काळात थोड्या क्षेत्रात अाणखी वाढ होईल. मात्र कपाशीचे क्षेत्र एक लाख हेक्टरपर्यंत पोचेल किंवा नाही अशी शंका उपस्थित होत अाहे. अपेक्षेनुसार तुरीची ३८ हजार ४४४ हेक्टरवर अातापर्यंत पेरणी झाली अाहे.

जिल्ह्यात सरासरी ४लाख ८० हजार हेक्टरपैकी अद्याप पावणेदोन लाख हेक्टर क्षेत्रावर पेरणी व्हायची अाहे. सध्या सुरू असलेल्या संततधार पावसामुळे दोन दिवसांपासून शेतीतील कामे प्रभावित झालेली असल्याने पावसाने उघडीप देताच उर्वरित क्षेत्रावरील पेरणी पुन्हा वेगाने सुरू होईल.