सांगली जिल्ह्यात खरीप पेरा रखडला

टोकणीसाठी सऱ्या तयार केल्यात. पाऊस नाही. त्यात उपसा बंदी केली आहे. त्यामुळे पेरणी केली नाही. पावसाची प्रतीक्षा करतोय. - शरद पवार, अहिरवाडी,ता. वाळवा, जि. सांगली.
सांगली जिल्ह्यात खरीप पेरा रखडला
सांगली जिल्ह्यात खरीप पेरा रखडला

सांगली : जिल्ह्यात वळीव पावसाने दडी मारली, मॉन्सून पाऊस लांबणीवर पडला. त्यामुळे जिल्ह्यातील तीन लाख ४८ हजार ४८९ हेक्टर क्षेत्रावरील खरिपाची पेरणी रखडली आहे. परिणामी शिवारावर चिंतेचे ढग दाटले आहेत. अन्यथा गेल्या हंगामाप्रमाणे या वेळीदेखील खरीप हंगाम संकटात सापडण्याची शक्यता आहे.

जिल्ह्यात यंदा वळवाचा पाऊस झालाच नाही. प्रामुख्याने दुष्काळी पट्ट्यात वळवाचा पाऊस होतो. त्यावर या तालुक्यातील शेतकरी खरीप हंगामातील पिकांची पेरणी करतात. परंतू पाऊसच झाला नसल्याने शेती पेरणीविना पडून आहे. जून महिना निम्मा झाला. मृग नक्षत्र सुरू होऊन पाच दिवस झाले. केवळ आकाशात ढगच जमा होताहेत, पण पाऊस काही येत नाही. त्यामुळे शेतकरी अस्वस्थ झाला आहे.

शेतकरी जिल्ह्यात प्रामुख्याने सोयाबीन, भात, ज्वारी आदी पिकांची पेरणी करतो. या वेळी उन्हाळी पाऊस अजिबात झाला नाही. परिणामी पेरणीपूर्व मशागतीची कामे पूर्ण झालेली नाहीत. तर शेतात उभा असणाऱ्या ऊस पिकाला विजेच्या लपंडावामुळे पाणी देता येत नाही. यामुळे शेतकऱ्यांचे मोठे नुकसान झाले आहे. 

जिल्ह्यात यंदा खरीप हंगामासाठी अंदाजे ३ लाख ४८ हजार ४९८ हेक्टर क्षेत्र पेरणीसाठी उपलब्ध आहे. यात सर्वाधिक पेरणी सोयाबीनची होती. पलूस तालुक्यात आगाप सोयाबीन पेरले जाते. पावसाअभावी आणि उपसा बंदी असल्याने तालुक्यात सोयाबीनची पेरणीच झाली नाही.  त्यातच पाण्याची खात्री नसल्याने शेतकरी पेरणी करण्यासाठी पुढे आला नाही.

शिराळा तालुक्यात सर्वाधिक क्षेत्र भात पिकाचे आहे. या तालुक्यात भाताची पेरणी वैशाखच्या पहिल्या आठवड्यापासून धूळवाफेवर पेरणी केली जाते. मात्र, या हंगामात धूळवाफेवर पेरणी करण्याचे प्रमाण कमी झाले आहे. आठवडाभरात पाऊस बरसला तरच पेरणी होईल, अन्यथा गेल्या हंगामाप्रमाणे या वेळीदेखील खरीप हंगाम संकटात सापडण्याची भीती निर्माण झाली आहे.

या पिकांची होते सर्वाधिक पेरणी (क्षेत्र हेक्टरमध्ये)

सोयाबीन ५७१६१
ज्वारी ६०८७३
बाजरी ४३१९३
भात  १३७८९

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com