मच्छीमारांसाठी किसान क्रेडीट कार्ड योजना ः खासदार राऊत 

सिंधुदुर्ग ः शेतकऱ्यांप्रमाणे पांरपरिक मच्छीमार, लहान मच्छीमारांसाठी किसान क्रेडीट कार्ड योजना राबविण्यात येणार असल्याचे स्पष्ट करतानाच कोरोनामुळे आंबा दलालांच्या कचाट्यातून मुक्त झाल्याचे मत खासदार विनायक राऊत यांनी येथे स्पष्ट केले. 

सिंधुदुर्ग दौऱ्यावर असलेल्या खासदार श्री. राऊत यांनी कणकवली येथे पत्रकारांशी संवाद साधला. यावेळी त्यांच्यासोबत पालकमंत्री उदय सांमत, आमदार वैभव नाईक, जिल्हा बॅंकेचे अध्यक्ष सतीश सांवत, संदेश पारकर,आदी उपस्थित होते. 

खासदार श्री. राऊत म्हणाले की, मच्छीमारांच्या डिझेल परताव्यासाठी मत्स्य आयुक्तांशी चर्चा झाली आहे. मात्र, मार्चअखेरमुळे डिझेलचा परतावा वितरित करता आला नाही. परंतु एप्रिल अखेरपर्यंत मच्छीमारांना परतावा मिळेल. तसा शब्द मत्स्यआयुक्तांनी आपल्याला दिला आहे. दरम्यान शासनाच्या विविध योजनांचा लाभ पांरपरिक मच्छीमार, लहान मच्छीमारांना व्हावा या हेतुने शेतकऱ्यांप्रमाणे किसान क्रेडीट कार्ड योजना राबविण्यात येणार आहे. 

आंब्याबाबत मुख्यमंत्र्यांनी आपलेपणा दाखविला. त्यानुसार ऑनलाइन आणि इतर अशी सुमारे १४ हजार १६८ टन आंबा मुंबई, पुणे यासारख्या शहरातील बाजारपेठांमध्ये दाखल झाला आहे. कोरोनामुळे हापूस दलालांच्या विळख्यातून सुटला आहे. यातून एक नवी दिशा आंबा बागायतदारांना मिळेल, अशी अपेक्षा त्यांनी व्यक्त केली. काजू बी ला १२० रूपये दर मिळावा, यासाठी जिल्हा बँक प्रयत्नशील असल्याचे सुद्धा श्री. राऊत यांनी स्पष्ट केले.