शेतमाल वाहतुकीसाठी ‘किसान रथ अॅप’; वाहनधाकर आणि शेतकऱ्यांतील दुवा 

नवी दिल्लीः लॉकडाऊनच्या काळात शेतमालाची वाहतुक करण्यासाठी मालवाहतुक गाड्यांची माहिती मिळावी यासाठी केंद्रीय कृषीमंत्री नरेंद्रसिंह तोमर यांनी ‘किसान रथ’ या मोबाईल ॲपचे अनावरण गुरुवारी (ता.१७) येथे केले. या ॲपच्या माध्यमातून व्यापारी, शेतकऱ्यांना शेतमालाची प्रथामिक आणि दुय्यम पातळीवर वाहतुक सरण्याची सुविधा उपलब्ध करून देण्यात आली आहे.  ‘किसान रथ’ ॲपची निर्मिती नॅशनल इन्फॉरमॅटीक सेंटरने (एनआयसी) केली आहे. या ॲपच्या माध्यमातून व्यापारी आणि शेतकऱ्यांना वाहतूकीसाठी मालवाहतुक गाड्यांची माहिती उपलब्ध होणार आहे. यात प्राथमिक पातळीवर शेतकऱ्यांच्या बांधावरून मंडी किंवा बाजार समित्या, शेतकरी उत्पादक कंपन्यांच्या खरेदी केंद्रांवरून आणि गोदामे आदी माल वाहतुकीचा सामवेश आहे. दुय्यम पातळीवर मंडी, बाजार समित्यांपासून राज्या अंतर्गत, राज्या-राज्यांमध्ये, प्रक्रिया केंद्रे, रल्वे स्टेशन, वेअरहाऊस आणि घाऊक व्यापारी आदी माल वाहतुकीचा समावेश आहे.  यावेळी बोलताना केंद्रीय कृषीमंत्री नरेंद्रसिंह तोमर म्हणाले, कि लॉकडाऊनच्या काळात शेतीसंबंधीत कामे ठप्प झाली होती. त्यामुळे पंतप्रधान नरेंद्र मोदी यांनी शेतीला सुट दिली त्यामुळे पिकांची काढणी आणि लागवडीची कामे सुरु झाली. आता ‘किसान रथ’ ॲपमुळे शेतमालाची वाहतुक सुरळीत होईल. शेतकरी, शेतकरी उत्पादक कंपन्या आणि सहकारी संस्थांना आपल्या मालाची देशभरात वाटेल तेथे वाटेल त्या वाहनाने वाहतुक करता येणार आहे. शेतकरी आणि व्यापाऱ्यांना बांधापासून ते बाजार समित्यांपर्यंत आणि बाजार समित्यांपासून देशभरात शेतमालाची वाहतुक करता येणार आहे. 

श्रेणीनुसार वाहतुक शक्य  ‘किसान रथ’ मोबाईल ॲपच्या माध्यमातून शेतमालाच्या श्रेणीनुसार वाहतुक करण्याची सुविधा उपलब्ध करून देण्यात आली आहे. अन्नधान्य (तृणधान्य, भरडधान्य, कडधान्य आदी), फळे आणि भाजीपाला, तेलबिया, मसाले, फुले, बांबू, तंतूमय पिके, वन्य उत्पादने नारळ आदी उत्पादनांची वाहतुक सोपी होणार आहे. तसेच व्यापाऱ्यांना नाशिवंत मालाची शीतवाहनाद्वारे वाहतुक करता येईल.  app Download link : https://play.google.com/store/apps/details?id=com.velocis.app.kishan.vahan