सोलापूर जिल्हा बॅंकेतही मिळणार ‘सन्मान' निधी

सोलापूर : सोलापूर जिल्हा मध्यवर्ती सहकारी बॅंकेचा सार्वजनिक वित्त व्यवस्थापन प्रणालीमध्ये ('पब्लिक फायनान्शियल मॅनेजमेंट सिस्टिम') समावेश झाला. त्यामुळे शेतकरी सन्मान निधीसह केंद्राच्या थेट योजनांची रक्कम जिल्ह्यातील शेतकऱ्यांच्या खात्यावर जमा होणार आहे. राज्याच्या इतर अनुदान योजनांचे पैसेही आता जिल्हा बॅंकेतून मिळण्याची सोय झाली आहे.

शेतकरी सन्मान योजनेचे सर्वाधिक लाभार्थी याच बॅंकेत आहेत. त्यामुळे शेतकऱ्यांना दिलासा मिळाला. सुमारे तीन लाख शेतकऱ्यांना याचा लाभ होणार आहे. जिल्ह्यातील लाभार्थी शेतकऱ्यांची संख्या सहा लाखांच्या आसपास आहे. निम्म्याहून अधिक म्हणजे तीन लाख शेतकऱ्यांची खाती जिल्हा मध्यवर्ती बॅंकेत आहेत. 

या पोर्टलवर येण्यासाठी गेल्या सहा महिन्यांपासून बॅंकेच्या प्रशासकांचे प्रयत्न सुरू होते. सार्वजनिक वित्तव्यवस्थापन प्रणाली शासनाच्या योजना राबविण्यासाठी बॅंकांना अत्यावश्‍यक आहे.

राष्ट्रीयीकृत बॅंकांमध्ये ती आहे. प्रामुख्याने शेती आणि शेतीपूरक उद्योगांसाठी कर्जे देणारी बॅंक असल्याने केंद्र आणि राज्याच्या अनेक योजनांतून अर्थसाह्य करण्यात येते. त्यामुळे या प्रणालीत जिल्हा बॅंकेचा समावेश व्हावा, असा प्रस्ताव प्रशासक शैलेश कोतमिरे यांनी केंद्राला दिला होता. त्याला मान्यता मिळाली. ही प्रणाली मिळालेल्या काही मोजक्‍याच सहकारी बॅंकांमध्ये आता सोलापूर जिल्हा बॅंकेचाही समावेश झाला.