बीटी बियाण्यांच्या विरोधात किसान संघाचे आंदोलन  

पुणे ः कापसाचे एचटीबीटी, वांग्याचे बीटी, जीई राई या बियाण्यांची अवैध पद्धतीने विक्री केली जात आहे. ही विक्री थांबविण्यासाठी सरकारने तातडीने पाऊले उचलून कारवाई करावी, न केल्यास अधिक तीव्र आंदोलन करण्याचा इशारा भारतीय किसान संघाचे राष्ट्रीय संघटनमंत्री दिनेश कुलकर्णी यांनी दिला.

भारतीय किसान संघाच्या वतीने पुणे जिल्हाधिकारी कार्यालयावर गुरुवारी (ता. ८) धरणे आंदोलन केले. या वेळी संघाचे पुणे जिल्हा अध्यक्ष भगवान फुलावरे, उपाध्यक्ष अशोक फडके, मधुकर टेमगिरे, संभाजी नरके, सूर्यकांत शिर्के, महेश सावंत, बबनराव केंजळे आदी उपस्थित होते.   

श्री. कुलकर्णी म्हणाले, की कापूस, वांगे आणि राई या बियाण्यांची मॉन्सेटो महिको या कंपन्या अवैध विक्री करत आहे. हे बेकायदेशीर असून संबधित कंपन्या विविध संस्था, अधिकारी यांच्याशी हात मिळवणी करून प्रसार करत आहे. त्यामुळे शेतकऱ्यांमुळे संभ्रम तयार होत असून या कंपन्या त्याचा फायदा घेत आहे. बीटी बियाणांच्या कोणत्याही चाचण्या केलेल्या नाही. तरीही विक्री कंपन्या विक्री करत आहे. जी. एम. पिकांच्या नावावर जेव्हा बीटी कापसाची शेती देशभरात प्रचलित झाली. तेव्हापासून नफेखोर बियाणे कंपन्यांचा दबाव वाढत गेला आहे. अन्नदात्या शेतकऱ्यांच्या आत्महत्यामध्ये भर पडत गेली आहे. जी.एम. पिकांमध्ये उत्पादक असे कोणतेही जीन अधिक प्रमाणात घातले गेलेले नाही. जे काही पिकत आहे, ते बियाण्यांची मूळ शक्ती आणि शेतकऱ्यांकडून काळजी घेण्यामुळेच पिकत आहे, असे असताना काही शास्त्रज्ञ, काही विक्री प्रचारतंत्र आणि काही आमिषांना बळी पडणारे प्रशासक, त्याचबरोबर राजकीय जबाबदारी असलेल्या व्यक्ती हे या बियाणांसंदर्भात चुकीची प्रसिद्धी करत आहे. मात्र, या तिन्ही प्रकारच्या बियाणांना अजून मान्यता मिळालेली नाही. हे बियाणे सादरकर्त्याजवळ सुरक्षित आहेत. हे बियाणे त्याच्याकडून शेतकऱ्यांपर्यंत कशी पोचली याची माहिती घ्यावी. यामुळे जनावरांवर व मनुष्याची हानी होत आहे. त्यामुळे सरकारने योग्य ती कारवाई करावी,’’ अशी मागणी त्यांनी केली.