'मतदान झालेल्या दुष्काळी भागात आचारसंहिता शिथिल करा'

मुंबई  ः लोकसभेच्या मतदानाच्या तीन टप्प्यातील निवडणुका पार पडल्या आहेत. राज्यात दुष्काळग्रस्त असलेल्या विदर्भातील सर्व, तर मराठवाड्यातील बहुतांश मतदारसंघांतील निवडणुका झाल्या आहेत. त्यामुळे दुष्काळग्रस्त आणि शेतकरी आत्महत्याग्रस्त भागातील आदर्श आचारसंहिता तत्काळ शिथिल करावी, अशी मागणी कै. वसंतराव नाईक शेतकरी मिशनचे अध्यक्ष किशोर तिवारी यांनी केली आहे.

यासंदर्भात श्री. तिवारी यांनी मुख्य निवडणूक आयुक्तांशी चर्चा देखील केली आहे. दुष्काळग्रस्त विदर्भ, मराठवाड्यात १० मार्चपासून आदर्श आचारसंहितेची अंमलबजावणी केल्यापासून दररोज ३ शेतकऱ्यांच्या आत्महत्या होत आहेत. या काळात हा आकडा २९२ वर गेला आहे, असा दावा तिवारी यांनी केला आहे. अन्नसुरक्षा, आरोग्य सुरक्षा, रोजगार, पाणी, चारा आणि नवीन पीककर्ज याबाबतचे प्रश्न निवडणुकीचे काम समोर करून सनदी अधिकारी, कर्मचारी टाळत आहेत. त्यामुळे धोरणात्मक निर्णय वगळता मदत पुनर्वसनाच्या कामांना गती देण्याकरता लोकसभेच्या मतदानाच्या पहिल्या, दुसऱ्या आणि तिसऱ्या टप्प्यात विदर्भ आणि मराठवाड्यात निवडणूक झालेल्या भागात आदर्श आचारसंहितेला शिथिल करण्याची गरज आहे, असे किशोर तिवारी यांनी म्हटले आहे.

१० मार्चपासून आदर्श आचारसंहितेची अंमलबजावणी सुरू झाल्यांनतर विदर्भ, मराठवाड्यातील जिल्ह्यांमधील दुष्काळग्रस्त शेतकरी आणि शेतमजुरांचे पाणी, चारा तसेच मजुरीसाठी हाल होत असल्याच्या तक्रारी येत आहेत. अशा तक्रारी आल्यानंतर मदत पुनर्वसनच्या कामांना आदर्श आचारसंहितेचा नावावर का रोखत आहात, अशी विचारणा केल्यावर अधिकारी निवडणूक आयोग आणि आचारसंहितेचे कारण समोर करत आहेत. यामुळे  तिवारी यांनी हा वाद निवडणूक आयोगसमोर आणला. चारा आणि पाणी नसल्यामुळे विदर्भ तसेच मराठवाड्यातील जिल्ह्यात दुष्काळग्रस्त शेतकरी, शेतमजुरांना जनावरे मातीमोल किमतीत विकावी लागत आहेत. त्यातच रोजगार हमी योजनेची कामेच उपलब्ध नसल्यामुळे उपासमार होत असल्याची खंत श्री. तिवारी यांनी व्यक्त केली आहे.