कोल्हापुरात कांद्याचे सौदे शेतकऱ्यांनी बंद पाडले

कोल्हापूर : कांद्याच्या दरात घसरण झाल्याने कोल्हापूर शेती उत्पन्न बाजार समितीत बुधवारी (ता. २३) शेतकऱ्यांनी सौदे बंद पाडले. कांद्याच्या दरात १००० ते १५०० रुपये प्रतिक्विंटल घसरण झाल्याने संतप्त झालेल्या शेतकऱ्यांनी बाजार समितीच्या कार्यालयाजवळ एकत्र येत संताप व्यक्त केला. अखेर बाजार समितीचे सचिव मोहन सालपे, उपसचिव जयवंत पाटील यांच्या मध्यस्थीनंतर सौदे पूर्ववत सुरू झाले.

गेल्या दोन दिवसांत कांद्याच्या दरात चांगली वाढ झाल्याने शेतकरी वर्गात समाधानाचे वातावरण होते. परंतु बुधवारी (ता. २३) बाजार सुरू होताच कांद्याच्या दरात मागील दराच्या तुलनेत प्रतिकिलो १० ते १५ रुपयांची घसरण झाल्याने शेतकरी संतप्त झालेत. शेतकऱ्यांनी बाजार समितीच्या कार्यालयाकडे आपला मोर्चा वळवला. सचिव श्री. पाटील यांनी राज्यातील इतर बाजारपेठांचा आढावा घेऊन दराची माहिती घेतली. व्यापाऱ्याशी ही चर्चा करून दर कमी न करण्याच्या सूचना दिल्या. यानंतर सौदे पूर्ववत सुरू झाले.

दरम्यान, कांदा व्यापाऱ्यांच्या मते राज्यातील बहुतांशी बाजार समितीमध्ये कांद्याची आवक वाढल्याने दर कमी झाले. अचानक आवकेचे प्रमाण वाढल्याने दर घसरल्याचे कारण व्यापाऱ्यांनी दिले असले तरी सरासरीच्या प्रमाणातच बाजार समितीत कांद्याची आवक असल्याचे दिसून आले. कोल्हापूर बाजार समितीत दररोज ५० ते ५५ गाडी कांद्याची आवक असते, तीच आवक आजही आहे. तर मंगळवारी कांद्याचे दर ४२०० ते ४५०० रुपये प्रतिक्विंटल होते, तेच बुधवारी ३२०० ते ३५०० रुपयांपर्यंत खाली आल्याने शेतकरी आक्रमक झाले.