कोल्हापुरात नवीन गुळाला साडेतीन ते सहा हजार रुपयांचा दर

कोल्हापूर : कृषी उत्पन्न बाजार समितीच्या शाहू मार्केट यार्डात शेतकऱ्यांकडून यंदाच्या हंगामातील नवीन गुळाची आवक झाली. जिल्हा सहकार उपनिबंधक अमर मोरे यांच्या हस्ते गुरुवारी सौदे झाले. या वेळी ३ हजार ५०० ते ६ हजार ५०० असा प्रतिक्विंटल भाव मिळाला.

बी. के. अतितकर यांच्या अडत दुकानात तानाजी जाधव आणि सागर जाधव (व्हन्नाळी, ता. कागल) या शेतकऱ्यांकडून, तर भैरवनाथ अडत दुकानात दत्तात्रय सावंत कुंजीरवाडी (ता. हवेली, जि. पुणे) यांच्याकडून या गुळाची आवक झाली. अडसाली उसाची लागवड होऊन ऊस तोडणी झाली. कर्नाटकात यंदाच्या नवीन गुळाची निर्मिती सुरू झाली. नवा गूळ सध्या शाहू मार्केट यार्डातील गूळ बाजारपेठेत आला. त्याचे मुहूर्ताचे सौदे यार्डात झाले.

गूळ व्यापारी अतुल शहा यांनी पहिल्या दहा किलोच्या ५१ गूळ रव्यांचे कलम ३ हजार ५०० ते ६ हजार ५०० या भावात खरेदी केले.  गुळाचा हंगाम आणखी दीड-दोन महिन्यांत सुरू होईल.

जिल्ह्यातील बहुतांशी भागात महापूर होता. ऊस शेती तसेच गुऱ्हाळघरेही पाण्यात गेली. त्यामुळे गूळनिर्मिती सुरू होण्यास विलंब लागेल, असा अंदाज आहे. असे असले तरी सद्या गुळाला मिळालेला भाव शेतकऱ्यांना दिलासा देणारा असल्याचे मत शेतकऱ्यांनी व्यक्त केले. 

यावेळी बाजार समितीचे सभापती बाबासो लाड, उपसभापती पाटील, संचालक कृष्णात पाटील, अमित कांबळे, सर्जेराव पाटील, दशरथ माने, उदयसिंह पाटील, आशालता पाटील, शेखर येडगे, संजय जाधव, शशिकांत आडनाईक, नंदकुमार वळंजू , सदानंद कोरगावकर आदी उपस्थित होते.