कोकण, मध्य महाराष्ट्रात पावसाचा जोर वाढणार

पुणे : बंगालच्या उपसागर आणि अरबी समुद्रात तयार होत असलेल्या कमी दाबाच्या क्षेत्रांमुळे राज्यात पावसाचा जोर वाढणार आहे. आजपासून (ता. १९) कोकण, मध्य महाराष्ट्रात मुसळधार पावसाची शक्यता आहे. मुंबई, रायगड जिल्ह्यासह पुणे, सातारा जिल्ह्यांच्या घाटमाथ्यावर काही ठिकाणी अतिवृष्टीचा इशारा देण्यात आला आहे. तर मराठवाडा, पूर्व विदर्भातही काही ठिकाणी जोरदार सरींचा अंदाज हवामान विभागाने वर्तविला आहे.

मॉन्सूनचा आस असलेला कमी दाबाचा पट्टा निवळला आहे. राजस्थानच्या अनेक भागांत पावसाने उघडीपही दिली आहे. मात्र मॉन्सूनचा परतीचा प्रवास लवकरच सुरू होण्याची शक्यता आहे. यातच बंगालच्या उपसागरात आंध्र प्रदेशच्या किनाऱ्यालगत असलेल्या चक्राकार वाऱ्यांच्या स्थितीमुळे या भागात कमी दाबाचे क्षेत्र तयार होत आहे. दुसरीकडे उत्तर कोकण आणि गुजरातच्या किनाऱ्यालगत उद्या (ता. २०) कमी दाबाचे क्षेत्र तयार होण्याचे आणि त्याची तीव्रता वाढण्याचे संकेत आहेत. ही स्थिती पोषक ठरल्याने शनिवारपर्यंत (ता. २१) कोकण, मध्य महाराष्ट्रात मुसळधार, तर उर्वरित राज्यात तुरळक ठिकाणी जोरदार पावसाची शक्यता आहे. 

बुधवारी (ता. १८) सकाळपासूनच कोकण, मध्य महाराष्ट्र, मराठवाड्यात ढगांची दाटी झाली होती. दुपारनंतर मुंबई उपनगर, पुणे, औरंगाबाद, जालना जिल्ह्यांच्या अनेक भागांत, तर अकोला जिल्ह्यातील अकोट, तेल्हारा या तालुक्यांमध्ये, तसेच बुलडाणा जिल्ह्यात काही ठिकाणी अर्धा ते पाऊण तास दमदार पाऊस झाला. सातपुड्याच्या पायथ्याशी असणाऱ्या गावांमध्ये विजांच्या कडकडाटासह पाऊस पडत होता. मंगळवारीही सायंकाळी वाशीम जिल्ह्यात मालेगाव परिसरात दमदार पाऊस झाला होता. सातारा जिल्ह्यातील फलटण तालुक्याच्या पूर्व भागात सर्वत्र मुसळधार पाऊस झाला. पावसाचा जोर अधिक असल्याने रस्त्यावरून पाणी वाहू लागले. माणमध्ये पावसाचे जोरदार आगमन झाल्यानंतर पाऊस दहीवडीकडे सरकला. 

बुधवारी (ता. १८) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस, मिलिमीटरमध्ये (स्रोत - हवामान विभाग) : कोकण : डहाणू ४६, वाडा ४७, कर्जत ५९, खालापूर १६०, माथेरान ८१, पनवेल ११६, सुधागडपाली ७२, भिवंडी ६०, कल्याण ५५, ठाणे ६०, उल्हासनगर ५१, मध्य महाराष्ट्र : नगर ३८, जामखेड ३२, नेवासा ३०, बोधवड ३१, आक्रणी ४२, जत ३५.  मराठवाडा : औरंगाबाद २९, कन्नड ३२, आष्टी ५१, आंबड ३६, घनसांगवी ४०, अहमदपूर ४३, लातूर ४२, निलंगा ५९, धर्माबाद २५, किनवट ५६, लोहा २५, माहूर २८.  विदर्भ : बल्लारपूर ७१, वरोरा ३०, अहेरी ५१, हिंगणा ४८, कळमेश्वर ६३, कामठी ३४, कुही ४५, सावनेर ७९, सेलू ४०, वणी ३५.