कोकणात पावसाच्या सरी

पुणे : कोकण किनारपट्टीवर पावसाच्या सरी बरसण्यास सुरवात झाली आहे. तर घाटमाथा, मध्य महाराष्ट्रातही तुरळक ठिकाणी पावसाने हजेरी लावली आहे. उद्यापासून (मंगळवार) कोकणात बहुतांशी ठिकाणी, मध्य महाराष्ट्र, मराठवाड्यात काही ठिकाणी पावसाची शक्यता असून, बुधवारपासून (ता. २०) या भागात पावसाचा जोर वाढण्याचा अंदाज आहे. दरम्यान नैर्ऋत्य मोसमी वाऱ्यांच्या (माॅन्सून) वाटचालीस पोषक स्थिती नसल्याने आणखी काही दिवस माॅन्सूनची वाटचाल जैसे थे राहणार असल्याचे हवामान विभागातर्फे स्पष्ट करण्यात आले.  मॉन्सूनचे प्रवाह मंदावल्यानंतर राज्यात हळूहळू पावसाला सुरवात झाली अाहे. रविवारी (ता. १७) सकाळपासून कोकण किनारपट्टी ढगांची दाटी झाली, तर मध्य महाराष्ट्र, मराठवाड्यात हलके ढग जमा झाले होते. सकाळपर्यंतच्या २४ तासांमध्ये कोकणात काही ठिकाणी मध्यम ते जोरदार पावसाच्या सरी पडल्या.  

वसई, भिवंडी, देवगड, मालवण, सांताक्रूझ, गुहागर, तलासरी, ठाणे, डहाणू येथे जोरदार पावसाने हजेरी लावली. घाटमाथ्यासह, सह्याद्रीच्या पूर्व उतारवरील जावळी मेढा, पाटण, लाेणावळा, इगतपुरी आदी भागांत पावसाच्या हलक्या ते मध्यम सरी कोसळल्या. मराठवाडा आणि विदर्भात मात्र मुख्यत: कोरडे हवामान होते. आज (ता. १८) मध्य महाराष्ट्र, मराठवाडा, विदर्भात तुरळक ठिकाणी वादळी पावसाची शक्यता अाहे.    

रविवारी सकाळी साडेआठ वाजेपर्यंतच्या २४ तासांमध्ये विदर्भातील चंद्रपूर येथे उच्चांकी ४०.४ अंश सेल्सिअस तापमानाची नोंद झाली. राज्यातील विविध ठिकाणचे कमाल तापमान (अंश सेल्सिअसमध्ये) : पुणे ३०.७, जळगाव ४०.०, कोल्हापूर ३१.५, महाबळेश्वर २०.३, मालेगाव ३९.०, नाशिक ३१.१, सातारा ३१.१, सोलापूर ३५.६, मुंबई ३२.१, अलिबाग ३०.२, रत्नागिरी ३१.७, डहाणू ३३.१, आैरंगाबाद ३४.६, परभणी ३७.७, नांदेड ३५.०, अकोला ३९.२, अमरावती ३८.६, बुलडाणा ३६.८, ब्रह्मपुरी ३९.८, चंद्रपूर ४०.४, गोंदिया ३९.६, नागपूर ३९.८, वर्धा ४०.०, यवतमाळ ३७.५. 

रविवारी (ता. १७) सकाळपर्यंतच्या २४ तासांमध्ये राज्यात विविध ठिकाणी पडलेला पाऊस (मिलिमीटरमध्ये, स्रोत - हवामान विभाग) :