कोकणातील पाण्यामुळे मराठवाड्याला दिलासा मिळेल : पालकमंत्री कदम

कोकणातील पाण्यामुळे मराठवाड्याला दिलासा मिळेल : पालकमंत्री कदम
कोकणातील पाण्यामुळे मराठवाड्याला दिलासा मिळेल : पालकमंत्री कदम

नांदेड :  ‘‘राज्य शासनाने कोकणातून मराठवाड्याला पाणी देण्याचा घेतलेला निर्णय दुष्काळग्रस्त मराठवाड्यातील शेतकरी, जनतेला दिलासादायक ठरणार आहे,’’ असे प्रतिपादन राज्याचे पर्यावरणमंत्री तथा नांदेड जिल्ह्याचे पालकमंत्री रामदास कदम यांनी केले.

जिल्हाधिकारी कार्यालयामध्ये आयोजित स्वातंत्र्य दिनाच्या मुख्य शासकीय समारंभामध्ये गुरुवारी (ता. १५) कदम बोलत होते. जिल्हा परिषद अध्यक्षा शांताबाई पवार, महापौर दीक्षा धबाले, खासदार प्रताप पाटील चिखलीकर, जिल्हाधिकारी अरुण डोंगरे, विशेष पोलिस महानिरीक्षक प्रकाश मुत्याल, जिल्हा परिषदेचे मुख्य कार्यकारी अधिकारी अशोक काकडे, महापालिकेचे आयुक्त लहुराज माळी, पोलिस अधीक्षक संजय जाधव, अप्पर पोलिस अधीक्षक दत्तराम राठोड, समाज कल्याण सभापती शीला निखाते, अप्पर जिल्हाधिकारी खुशालसिंह परदेशी, निवासी उपजिल्हाधिकारी अनुराधा ढालकरी, उपविभागीय अधिकारी लतीफ पठाण उपस्थित होते.

कदम म्हणाले, ‘‘यंदाच्या पावसाळ्यात सांगली, कोल्हापूर, सातारा जिल्ह्यांमध्ये अतिवृष्टी झाली. परंतु मराठवाडा मात्र मोठ्या पावसाअभावी तहानला आहे. मराठवाड्यावर निसर्गाची अवकृपा आहे. शेतकरी पावसाची वाट पहात आहेत. दुष्काळी परिस्थितीवर मात करण्यासाठी मुख्यमंत्री देवेंद्र फडणवीस यांनी मराठवाड्याला कोकणामधून मराठवाड्याला पाणी देण्याचा निर्णय निश्चित दिलासा देईल.’’

‘‘जिल्हाधिकारी कार्यालय परिसरात पावसाचे पाणी जमिनीत साठवण्याचा जलपुनर्भरणाचा उपक्रम जिल्हा प्रशासनाने हाती घेतला आहे. हा उपक्रम शहरी, ग्रामीण भागातही राबविला पाहिजे. सर्वांनी प्रयत्न केल्यास दुष्काळाशी सहज सामना करू शकतो. टंचाईसह विविध विकासकामांसाठी राज्य शासन मराठवाड्याच्या सदैव पाठीशी राहील,’’ असे कदम यांनी सांगितले.

कदम यांच्या हस्ते दीनदयाल उपाध्याय अंत्योदय अभियानांतर्गत पात्र लाभार्थ्यांना गॅस वितरण करण्यात आले. गुणवंत विद्यार्थी, उत्कृष्ट कामगिरी करणारे कर्मचाऱ्यांचा सत्कार करण्यात आला. कोल्हापूर आणि सांगली जिल्ह्यातील पूरग्रस्तांच्या मदतीसाठी दत्ता देशमुख, विजय देशमुख, विक्रांत देशमुख, बालाजी नरंगले, पत्रकारांकडून मुख्यमंत्री सहायता निधीसाठीचा धनादेश कदम यांच्याकडे सुपूर्त करण्यात आला. रेन वॉटर हार्वेस्टिंगचे कदम यांच्या हस्ते उद्‍घाटन झाले. 

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com