जळगाव ः खानदेशात मक्‍याच्या शासकीय केंद्रातील विक्रीसंबंधीच्या ऑनलाइन नोंदणीला शेतकऱ्यांचा चांगला प्रतिसाद मिळत आहे. परंतु, प्रशासनाकडून गोदामांची व्यवस्था अद्याप झालेली नाही. यामुळे खरेदी सुरू होण्यासंबंधी विलंब लागू शकतो, अशी स्थिती आहे.
शासनाच्या निर्देशानुसार मका, ज्वारी खरेदीसंबंधी शेतकऱ्यांकडून ऑनलाईन नोंदणी शासकीय केंद्रात सुरू आहे. जळगाव जिल्ह्यात सर्व १५ तालुक्‍यांमध्ये खरेदी होणार आहे. तर, धुळे व नंदुरबारातही मिळून सात केंद्र असतील. ज्वारीला २५५०, तर मक्‍याला १७६० रुपये प्रतिक्विंटलचा दर हमीभावानुसार मिळेल. सध्या बाजारात लूट सुरू असून, मक्‍याची किमान ११०० ते कमाल १३०० रुपये प्रतिक्विंटलने खरेदी सुरू आहे. शेतकऱ्यांचे रोज लाखो रुपयांचे नुकसान होत आहे. यामुळे शासकीय खरेदी सुरू करण्याची मागणी सुरू आहे.
दरम्यान, शासकीय खरेदी गोदामे उपलब्ध झाल्याशिवाय सुरू होवू शकत नाही. अद्याप जळगाव, धुळे भागात गोदामे उपलब्ध झालेली नाहीत. ही जबाबदारी तहसिल प्रशासनाची आहे. तहसीलदारांकडे याबाबत जळगाव व इतर भागातील केंद्रधारक संस्थांनी पत्रव्यवहार केला आहे. परंतु, तहसिलदार यांच्याकडून प्रतिसाद नाही.
सध्या हरभरा खरेदी सुरू आहे. ही खरेदी किमान १२ जूनपर्यंत सुरू राहील. मका खरेदी १२ जूननंतर सुरू होईल, असेही दबक्‍या आवाजात काही केंद्रधारक संस्था सांगत आहेत. परंतु, मका खरेदी १ जूनपासून सुरू करावी, अशी मागणी शेतकरी करीत आहेत. यासंदर्भात पालकमंत्री गुलाबराव पाटील यांनी दखल घ्यावी, असा मुद्दा शेतकरी ज्ञानेश्‍वर चौधरी (आव्हाणे, ता.जळगाव) यांनी उपस्थित केला.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.