‘समृद्धी’साठी जमीन संपादन प्रक्रिया अंतिम टप्प्यात

अकोला : प्रस्तावित नागपूर-मुंबई समृद्धी महामार्गासाठी जमीन संपादनाची प्रक्रिया अंतिम टप्प्यात पोचली असून हा महामार्ग वऱ्हाडातील वाशीम व बुलडाणा जिल्ह्यातून जात अाहे. या दोन जिल्ह्यांत अाजवर संपादित झालेल्या जमिनीचा मोबदला म्हणून शेतकऱ्यांना एक हजार ८६ कोटी रुपये मिळाले अाहेत. बुलडाण्यात सर्वाधिक ६४० कोटी रुपये वाटप झाले अाहेत. वाशीमला ४४६ कोटी रुपये मिळाले. भूसंपादनाची प्रक्रिया शेवटच्या टप्प्यात पोचली असून, यावर्षी या महामार्गाच्या कामाला सुरवात होईल, असे सांगितले जात अाहे.  

मुख्यमंत्री देवेंद्र फडणवीस सरकारचा ड्रीम प्रोजेक्ट म्हणून नागपूर-मुंबई समृद्धी महामार्गाकडे पाहिले जात आहे. या महामार्गासाठी आवश्यक जमीन केंद्राच्या नवीन भूसंपादन कायद्यानुसार खरेदी करण्यात अाली. जमिनीच्या प्रकारानुसार, शेतात असणाऱ्या प्रत्येक बाबीचा मोबदला शेतकऱ्यांना देण्यात अाला अाहे. बुलडाणा जिल्ह्यात या महामार्गासाठी ११३६.८६ हेक्टर जमीन खरेदी करायची होती. अातापर्यंत १००७.२७ हेक्टर जमीन खरेदी झाली अाहे. या जिल्ह्यात अातापर्यंत ९० टक्के काम पूर्ण होत अाले अाहे. १० टक्केच जमिनीची खरेदी व्हायची अाहे. ही प्रक्रिया अाता कायद्यानुसार होणार अाहे. या जिल्ह्यात २५६९ शेतकऱ्यांच्या जमिनींची १८२५ खरेदी झाली अाहे.  

दुसरीकडे वाशीम जिल्हासुद्धा खरेदीच्या बाबतीत अग्रेसर अाहे. या जिल्ह्यात आतापर्यंत ९४३ हेक्टर जमीन संपादित करण्यात आली. या जमिनीचे मालक असलेल्या अडीच हजार शेतकऱ्यांना सुमारे ४४६ कोटी रुपयांचा मोबदला वाटप करण्यात आला अाहे. समृद्धी महामार्ग हा राज्यात ११ जिल्ह्यांमधून जात अाहे. त्यात वाशीमचाही समावेश अाहे. या जिल्ह्यातील  ५४ गावांमधील १४०९ हेक्टर शेतजमीन संपादित केली जाणार अाहे. यापैकी आतापर्यंत ९४३ हेक्टर जमिनीचे संपादन झाले अाहे.

या महामार्गाच्या जमीन संपादन प्रक्रियेसाठी महसूल अधिकाऱ्यांच्या पोस्टिंग करण्यात अाल्या अाहेत. काही जिल्ह्यांमध्ये खरेदी प्रक्रिया पूर्णत्वास अालेली असल्याने मूळ पदावर पाठवण्याची मागणी हे प्रभारी अधिकारी करू लागले अाहेत.