अकोला : गतहंगामातील पीक विम्यापासून शेतकरी वंचित

अकोला ः गेल्या हंगामात शेतकऱ्यांनी काढलेल्या सोयाबीन पिकाचा विमा अद्यापही मिळाला नसल्याची बाब समोर आली आहे. हा लाभ किती दिवसांनी मिळेल असा प्रश्न शेतकरी प्रशासनाला करीत आहेत. कौलखेड मंडळातील शिवापूर, चांदूर, आकोली आणि सोमठाणा या चार गावांतील शेतकरी पंतप्रधान पीकविमा नुकसानभरपाईपासून वंचित आहेत.

याबाबत मिळालेल्या माहितीनुसार, या चार गावांतील शेतकऱ्यांनी गेल्या हंगामात पीक उतरविला होता. परंतु, त्यांना कुठलीही नुकसानभरपाई मिळालेली नाही. या बाबत शेतकऱ्यांनी पालकमंत्री बच्चू कडू यांच्याकडे निवेदन दिले आहे. या शेतकऱ्यांनी विम्याचा हप्ता खडकी येथील जिल्हा बँकेच्या शाखेत भरला होता. परंतु, आजवर कुठलीही मदत न मिळाल्याने शेतकरी डावलल्याची बाब समोर आली.

या बाबत माजी सरपंच प्रल्हाद ढोरे यांनी प्रशासनाकडे माहिती घेतली असता स्थानिक पातळीवर संबंधित विमा कंपनीचा कोठलाही अधिकारी नाही. शेतकऱ्यांनी बँकेकडे विचारणा केली तर त्यांना संबंधित विमा कंपनीच्या दिल्लीस्थित कार्यालयाचा पत्ता देण्यात आला. त्यामुळे वंचित राहिलेल्या या शेतकऱ्यांनी पालकमंत्री, जिल्हाधिकारी यांना निवेदन देत मदतीची मागणी केली आहे. मदत न मिळाल्यास आंदोलनाचा इशारा दिला आहे.

आम्ही शेतकऱ्यांनी पीकविमा काढण्यासाठी सर्व आवश्‍यक कागदपत्रे दिली होती. वेळेत विमा रक्कम भरली. तरीही कौलखेड महसूल मंडळातील शेकडो शेतकरी २०१९-२० च्या खरीप हंगामातील सोयाबीन पीकविम्याच्या रकमेपासून वंचित आहेत. या विमा कंपनीचे कार्यालय केवळ मुंबई व दिल्ली येथे असल्याने शेतकऱ्यांना कंपनीकडे संपर्क साधणे सुद्धा शक्य होत नाही. आता काय करावे असा प्रश्न उपस्थित झालेला आहे. - प्रल्हाद ढोरे, शेतकरी, शिवापूर