लातूर बाजार समितीतर्फे हमालांना जीवनावश्यक वस्तूंचे कीट

लातूर : बाजार समितीतर्फे परवानाधारक १८०० हमालांना जीवनावश्यक वस्तुंचे किट शुक्रवारी (ता. १०) वाटप करण्यात आले. 

‘कोरोना’मुळे देशात लॉकडाऊन आहे. लातूर बाजार समितीमधील व्यवहार बंद आहेत. हातावर पोट असलेल्या हमालावर उपासमारीची वेळ आली आहे. अशा काळात हमाल बांधवासाठी जीवनावश्यक वस्तुचे किट वाटप करा, अशा सूचना पालकमंत्री अमित देशमुख यांनी बाजार समितीच्या संचालक मंडळाला दिल्या होत्या.

  सामाजिक दृष्टिकोनातून हा उपक्रम राबवून हमालांच्या मदतीला बाजार समिती धावली आहे. शुक्रवारी उपजिल्हाधिकारी सुनिल यादव, जिल्हा उपनिबंधक समृत जाधव, तहसिलदार स्वप्नील पवार, सहाय्यक निंबंधक कदम, बाजार समितीचे सभापती ललितकुमार शहा, उपसभापती मनोज पाटील, माजी आमदार वैजनाथ शिंदे यांच्या हस्ते १० हमालांना प्रातिनिधिक स्वरूपात ‘सोशल डिस्टन्सिंग’ पाळून या कीटचे वाटप करण्यात आले. त्यात गहु (आटा) तांदूळ, तेल, डाळ, चहापती, खोबरेल तेल आदी २० जीवनावश्यक वस्तुंचा समावेश आहे. 

बाजार समितीचे संचालक विक्रम शिंदे, संभाजी वायाळ, सुधीर गोजमगुंडे, बाळासाहेब बिदादा, तुकाराम आडे, तात्या बेद्रे, हर्षवर्धन सवई , प्रभारी सचिव सतिश भोसले, प्रभारी सहाय्यक सहसचिव भास्कर शिंदे आदी उपस्थित होते.