वाहतूक परवाने नसल्याने लॉन उत्पादक अडचणीत 

पुणे : लॉकडाऊनचा मोठा आर्थिक फटका मुळशीतील लॉनशेती करणाऱ्या शेतकऱ्यांना बसला आहे. सध्या लॉन काढणीला आलेले असताना व मागणीही असताना वाहतुक परवाना नसल्याने काढणी ठप्प झाली आहे. यामुळे मुळशी तालुक्यातील लॉन उत्पादक गावातील शेतकऱ्यांचे चार ते पाच कोटी रुपयांचे नुकसान होण्याची शक्यता आहे. तसेच या व्यवसायात काम करणाऱ्या सुमारे दीडशे शेत मजुरांवर उपासमारीची वेळ आली आहे. 

भातपिकासाठी प्रसिद्ध असलेल्या मुळशी तालुक्यात काही गावांमध्ये अलीकडील काळात लॉनशेतीचा मोठ्या प्रमाणात प्रचार आणि प्रसार होऊ लागला आहे. हिंजवडी आयटी क्षेत्राच्या लगतच्या चांदे, नांदे, माण, भरे, मूलखेड, म्हाळुंगे या गावांमध्ये मोठ्या प्रमाणात लॉन शेती केली जाते. या गावांमध्ये अंदाजे चारशे ते साडे चारशे एकर क्षेत्रावर लॉन शेती होते. या लॉनसाठी कोकण, कर्नाटक, मध्यप्रदेश, गोवा, पुणे, मुंबई, नाशिक अशा विविध भागातून मोठी मागणी आहे. सध्या कोरोनाच्या पार्श्वभूमीवर रेड झोन वगळता अनेक ठिकाणाहून लॉनसाठी मागणी आहे. परंतु लॉन वाहतूकीला परवानगी नसल्याने शेतकऱ्यांना अडचणी येत आहेत. त्यामुळे शासनाने तातडीने लक्ष घालून परवानागी द्यावी, अशी मागणी शेतकरी करत आहेत.  दरवर्षी लॉन उत्पादक शेतकऱ्यांना एकरी चार लाख रूपयांचे उत्पन्न मिळते. तर सहा महिन्यांतून जवळपास दोन लाखाचे उत्पादन मिळते. त्यामुळे अनेक शेतकरी भात उत्पादनाऐवजी आधुनिक पद्धतीने लॉन शेती करत आहेत. यामध्ये तैवाण वाण, इलेक्शन नंबर वन, बरमोडा, अमेरिकन फ्लू अशा विविध प्रकारचे उत्पादन शेतकरी घेतात.  चांदे येथील प्रयोगशील व लॉन उत्पादक शेतकरी प्रमोद मांडेकर म्हणाले, ‘‘माझ्याकडे एकूण आठ ते दहा एकर लॉन शेती आहे. गेल्या अकरा वर्षांपासून मी लॉनशेती करत आहे. पावसाळ्यापूर्वी एप्रिल व मे महिन्यात लॉनला मोठी मागणी असते. यंदा हंगामाच्या काळातच विक्री बंद असल्याने शेतकऱ्यांचे लाखो रुपयांचे नुकसान होत आहे. लॉनच्या विक्रीकरिता शेतीमालाअंतर्गत कृषी विभागाने वाहतूक परवाना द्यावा.