सावळजमधील अग्रणी ‘टेंभू'पासून वंचित

सांगली :  सावळजसह पूर्व भागात शेतीच्या पाण्याची टंचाई आहे. विसापूर - पुणदी व म्हैसाळ या योजना वारंवार बंद राहतात. योजनांपासून काही भाग वंचित राहत आहे. आर्थिकदृष्ट्या सक्षम शेतकऱ्यांनाच लाभ होतो. पर्याय म्हणून खानापूर तालुक्‍यातील टेंभूच्या पाचव्या टप्प्याची उंची वाढवून सिद्धेवाडी तलावात पाणी टाकून अग्रणी बारमाही करण्याचे नियोजन केले आहे. अजून एकदाही सावळज परिसरातील अग्रणीत 'टेंभू'चे पाणी न आल्याने शेतकऱ्यांमध्ये निराशा आहे. 

टेंभू उपसा योजनेतून अग्रणी नदी बारमाही करण्याचा निर्णय गेल्या तीन वर्षापूर्वी झाला. त्यानुसार पाटबंधारे विभागाने काम देखील सुरु केले. तासगाव पूर्व भागात द्राक्ष शेतीचे क्षेत्र मोठ्या प्रमाणात आहे. गेल्यावर्षी अपेक्षित पाऊस झाला नाही. त्यामुळे या भागातील तलाव कोरडे होते. टेंभू उपसा सिंचन योजनेतून तलाव भरणे अपेक्षित होते. मात्र, तसे केले नाही. त्यामुळे द्राक्ष उत्पादक शेतकरी चिंतेत आहेत. 

लोकसभा निवडणुकीच्या तोंडावर ''टेंभू''चा पाचव्या टप्प्यातून प्रायोगिक तत्त्वावर चाचणीसाठी अग्रणीत पाणी सोडण्यात आले. ते सिद्धेवाडी तलावात पोचल्याने शेतकऱ्यांच्या आशा पल्लवीत झाल्या. परंतु, ते पाणी सावळज परिसरातील अग्रणीत न आल्याने अग्रणीसह, काठावरील द्राक्षशेती पाण्यापासून वंचित राहिली.

नदीकाठावरील १०० हून अधिक हेक्‍टर द्राक्षपीक संकटात आहे. उन्हाळ्यात बागांना पाण्याची गरज भासते. शेतकरी टॅंकरने पाणी विकत घेत आहेत.