परभणी जिल्ह्यात कापसाला किमान सात हजार रुपये दर

परभणी ः जिल्ह्यात यंदाच्या हंगामातील खासगी कापूस खरेदीस सुरु झाली आहे. मानवत येथे अनेक जिनिंग उद्योजकांनी कापूस खरेदी सुरु केली आहे. सध्या दररोज सरासरी ७०० ते ८०० क्विंटलपर्यंत आवक होत आहे. दर्जानुसार किमान ७ हजार रुपये दराने खरेदी केली जात आहे. 

जिल्ह्यात यंदा १ लाख ८१ हजार हेक्टरवर कापूस लागवड झाली आहे. अतिवृष्टी तसेच सततच्या पावसामुळे पाणी साचून राहिल्याने अनेक मंडलातील कपाशीची बोंडसड झाली आहे. त्यामुळे उत्पादनात मोठी घट येत आहे. ऑक्टोबर हिटमुळे बोंडे फुटली आहेत. परंतु सोयाबीन काढणीच्या कामांमुळे मजुर मिळत नसल्यामुळे कापूस वेचणीची कामे रखडली आहेत. 

मजुर उपलब्ध झाल्यामुळे परभणी, सेलू, मानवत तसेच अन्य तालुक्यात कापूस वेचणी सुरु आहे. अनेक शेतकऱ्यांचा कपाशीचा एकाच वेचणीमध्ये झाडा झाला आहे. आर्थिक गरजांसाठी गेल्या काही दिवसांपासून शेतकरी विविध ठिकाणच्या बाजार पेठांमध्ये कापूस विक्रीसाठी नेत आहेत. मानवत येथील जिनिंग सात ते आठ जिनिंगमध्ये खासगी व्यापाऱ्यांनी कापूस खरेदी सुरु केली आहे. बुधवारी (ता.२०) कापसाच्या प्रतीनुसार प्रतिक्विंटल ७ हजार ते ७ हजार ४०० रुपये दर मिळाले.

काही जिनिंग उद्योजकांनी खरेदी केलेल्या कापसावर प्रक्रिया करून रुईच्या गाठी निर्मिती सुरु केली आहे. परंतु खेड्यापाड्यातून पाच ते सहा हजार रुपये प्रतिक्विंटल दराने किरकोळ खरेदी केली जात आहे. खुल्या बाजारात कापसाचे दर आधारभूत किंमतीपेक्षा जास्त आहेत. त्यामुळे भारतीय कापूस महामंडळ (सीसीआय) आणि राज्य सहकारी कापूस उत्पादक पणन महासंघामार्फत कापूस खरेदी तूर्त सुरु होण्याची शक्यता नाही. गाठी शिल्लक नसल्यामुळे खुल्या बाजारातील दर वधारण्याची शक्यता असल्याचे व्यापारी सूत्रांनी सांगितले.