परभणी ः लातूर येथील गळीतधान्‍ये संशोधन केंद्र येथे बुधवारी (ता. २०) सकाळी ११ वाजता जवस दिनानिमित्त पीक प्रात्यक्षिकाचे आयोजन करण्यात आले आहे, अशी माहिती संशोधन संचालक डॉ. दत्तप्रसाद वासकर यांनी दिली.

वसंतराव नाईक मराठवाडा कृषी विद्यापीठांतर्गत लातूर ये‍थील गळीतधान्‍ये संशोधन केंद्र आणि हैदराबाद येथील तेलबिया संशोधनालय यांच्‍या संयुक्‍त विद्यमाने या कार्यक्रमाचे आयोजन करण्यात आले आहे. कुलगुरू डॉ. अशोक ढवण अध्यक्षस्थानी राहणार आहेत. हैदराबाद येथील शास्‍त्रज्ञ डॉ. एस. एन. सुधाकरबाबू यांच्‍या हस्‍ते उद्‍घाटन होणार आहे.संशोधक संचालक डॉ. वासकर, हैदराबाद येथील जवस प्रकल्‍पाचे शास्‍त्रज्ञ डॉ. ए. एल. रत्‍नकुमार, मुंबई येथील भाभा अणू संशोधन केंद्राचे शास्‍त्रज्ञ डॉ. संजय जांभूळकर आदी उपस्थित राहणार आहेत.

या वेळी जवस पीक प्रात्यक्षिकांचे आयोजन करण्‍यात आले असून, संशोधन केंद्राच्‍या १५ एकर प्रक्षेत्रावर ९० दिवसांत तयार होणारे विद्यापीठाने विकसित केलेल्या नवीन वाण लातूर ९३ आणि इतर ४० वाणांचे पीक प्रात्‍यक्षिक पाहता येणार आहे. कृषिदर्शनीचेही आयोजन करण्‍यात आले असून, यात जवसाचे मूल्यवर्धित पदार्थ, जवस तेल, जवस चिक्की, जवस चटणी, जवस प्रतवारी, पॅकेजिंग आदींचा समावेश राहणार आहे. बचत गट सदस्‍यांना जवस लागवड, प्रक्रिया, मूल्यवर्धन यावर प्रशिक्षण देण्‍यात येणार आहे. तांत्रिक सत्रात तीळ मूल्यवर्धन यावर डॉ. जांभूळकर, तेलबिया संशोधन व पुढील वाटचाल यावर डॉ. वासकर, सूर्यफूल लागवडीवर डॉ. सुधाकरबाबू, जवस लागवडीवर डॉ. रत्‍नकुमार, जवस मूल्यवर्धन यावर उदय देवळाणकर, जवस पिकावर शेतकरी अशोक चिंते हे मार्गदर्शन करणार आहेत.