मंचर बाजारात मागणीअभावी बटाटा वाणाची पोती पडून

मंचर, जि. पुणे  : येथील बटाटा बाजारपेठेवर मोठा परिणाम झाला आहे. गेल्या वर्षाच्या तुलनेत प्रती क्विंटलचे बाजारभाव ५०० रुपयांनी कमी होऊनही खरेदीदार शेतकरी नसल्याने बटाटा वाणाची पोती पडून आहेत. रविवारपर्यंत (ता. १३) एक हजार ३४३ टन बटाटा वाणाची आवक झाली. परंतु, अजून २५ टक्केही बटाटा वाणाची विक्री झालेली नाही.

मंचरची बटाटा बाजारपेठ राज्यात सर्वांत मोठी आहे. कृषी उत्पन्न बाजार समितीच्या आवारात बटाटा वाण खरेदी विक्रीचे व्यवहार खरीप व रब्बी हंगामात होतात. आंबेगाव, खेड, जुन्नर व शिरूर तालुके बटाटा उत्पादनात अग्रेसर होते. पण, आता एकरी उत्पादनात घट होत आहे. तसेच कीटकनाशके, खते, मजुरी खर्चात वाढ झाली आहे. चार ते पाच वर्षांपूर्वी उत्पादित बटाट्याला प्रती किलोला १८ ते वीस रुपये बाजारभाव मिळत होता. सध्या प्रती किलोला १४ ते १५ रुपयांपेक्षा अधिक भाव मिळत नाही. आर्थिक तोटा होत असल्याने अनेक शेतकऱ्यांनी बटाटा लागवडीकडे पाठ फिरवली आहे, असे व्यापारी  धनेश रामजी थोरात व पंढरीनाथ पोखरकर (माडीवाले) यांनी सांगितले.

मंचर येथील कृषी उत्पन्न बाजार समितीच्या आवारात जालंदर (पंजाब), इंदौर, मध्यप्रदेश भागातून बटाटा वाण विक्रीसाठी आला आहे. तीस अडत्यांमार्फत बटाटा वाणाची विक्री शेतकऱ्यांना केली जाते. गेल्यावर्षी प्रती क्विंटलला १६०० ते २२५० रुपये असा बटाटा वाण विक्रीचा बाजारभाव होता. सध्या प्रती क्विंटल एक हजार ३०० ते एक हजार ८०० रुपये विक्रीचा बाजारभाव आहे. आता बटाटा वाण पाठवू नका, असे जालंदर व इंदौर भागांतील व्यापाऱ्यांना कळविले असल्याची माहिती व्यापारी संजय मोरे यांनी दिली.