सातारा जिल्ह्यात हलका ते मध्यम स्वरूपाचा पाऊस

सातारा ः जिल्ह्यात हलका ते मध्यम स्वरूपाचा सर्वदूर पाऊस बुधवारी (ता. २५) झाला आहे. दुष्काळी तालुक्यात गेल्या दोन दिवसांच्या तुलनेत पावसाचा जोर कमी झाला आहे. गुरुवारी सकाळी आठपर्यंत सरासरी १५.५४ मिलिमीटर पावसाची नोंद झाली आहे.

जिल्ह्यात गेली दोन दिवस मुसळधार पावसानंतर बुधवारी पावसाचा जोर ओसरला आहे. बहुतांशी ठिकाणी सायंकाळी व रात्री पावसाचा जोर वाढत आहे. बुधवारी रात्री माण, खटाव, फलटण या तालुक्यांत हलका ते मध्यम स्वरूपाचा पाऊस झाला आहे. हा पाऊस दुष्काळी तालुक्यातील रब्बी हंगामाच्या दुष्टीने फायदेशीर ठरणार आहे. तसेच पाणीटंचाई कमी होण्यास मदत होणार आहे. 

पश्‍चिम भागात पावासाचा जोर कायम आहे. यामुळे शेतकऱ्यांची चिंता वाढली आहे. अनेक ठिकाणी झालेल्या दमदार पावसामुळे पिके पाण्यात आहे. तसेच अति पाण्यामुळे पिके पिवळी पडू लागली आहे. शेतातील पाण्यामुळे सर्व कामे ठप्प झाली आहेत. कोयना धरण क्षेत्रात पावसाचा जोर ओसरला असल्याने धरणाचे सर्व दरवाजे बंद करून विसर्ग बंद करण्यात आला आहे. सध्या धरणाच्या पायथा वीजगृहातून २१०० क्युसेक विसर्ग सुरू आहे. सध्या धरणात एकूण १०४.८१ टीएमसी पाणीसाठा झाला आहे. 

तालुकानिहाय पाऊस मिलिमीटरमध्ये सातारा २४.६३, जावळी १६.१५, पाटण १४.८२, कराड १८.६९, कोरेगाव १३.००, खटाव १०.१२, माण ६.२९, फलटण ७.३३, खंडाळा १०.७०, वाई २१.८३, महाबळेश्‍वर २५.४०.