मराठवाड्यात सार्वत्रिक दमदार पावसाची प्रतीक्षा

औरंगाबाद : आकाशात ढगांची गर्दी होऊन पाऊस येण्याची स्थिती निर्माण होते. मात्र, प्रत्यक्षात पाऊस पडतच नसल्याने मराठवाड्यात सार्वत्रिक दमदार पावसाची प्रतीक्षा कायम असल्याचे चित्र आहे. गुरुवारी (ता. ११) सकाळपर्यंतच्या चोवीस तासांत मराठवाड्यातील औरंगाबाद, जालना, बीड, उस्मानाबाद व लातूर जिल्ह्यांतील १४२ मंडळांत पावासाने हजेरी लावली. परंतु, अपवाद वगळता बहुतांश मंडळांत तुरळक ते हलक्‍या पावसाचीच नोंद झाली.  

औरंगाबाद जिल्ह्यातील ६५ मंडळांपैकी ४७ मंडळांत पाऊस झाला. औरंगाबादसह गंगापूर, सोयगाव तालुक्‍यांत पावसाचा जोर थोडा अधिक होता. औरंगाबाद मंडळात ३८ मिलिमीटर, उस्मानपुरा ३५, भावसिंगपुरा ४१, चित्तेपिंपळगाव २१, चौका १५, लाडसावंगी २०, करमाड २२, कांचनवाडी ३५, वरूडकाझी ११, तर चिकलठाणा मंडळात ३३ मिलिमीटर पावसाची नोंद झाली. पैठण तालुक्‍यातील पैठण मंडळात २१ मिलिमीटर, बालानगर ११, पाचोड १८, आडूळ १०, लोहगाव १०, विहामांडवा ११, नांदर १४.५०, तर पिंपळगाव पी मंडळात १९ मिलिमीटर पाऊस झाला.  

सोयगाव तालुक्‍यातील सोयगाव मंडळात २०, तर बनोटीत १२ मिलिमीटर पाऊस झाला. वैजापूर मंडळात २२ मिलिमीटर, महालगाव ११, खंडाळा १२, लाडगाव १८, लासूरगाव १०, नागमठाण मंडळात १८ मिलिमीटर पाऊस झाला. गंगापूर तालुक्‍यातील गंगापूर मंडळात ५७ मिलिमीटर, वाळूज २५, मांजरी ५२, सिद्धनाथ वडगाव १६, हर्सूल १४, तुर्काबाद २७, भेनडाला १९ मिलिमीटर पावसाची नोंद झाली. कन्नड व खुलताबाद तालुक्‍यांतील चार मंडळांत तुरळक पाऊस वगळता पावसाने पाठच फिरविली. लातूर जिल्ह्यातील ५३ पैकी केवळ एका मंडळात, तर उस्मानाबाद जिल्ह्यातील ४२ पैकी केवळ १७ मंडळांत पाऊस झाला.

जिल्ह्यातील भूम तालुक्‍यातील लिट मंडळातील २३ मिलिमीटर, अंबी मंडळात १५, वाशी तालुक्‍यातील पारगाव मंडळात १५ मिलिमीटर पाऊस पडला. उर्वरित मंडळात तुरळकच हजेरी लागली.