खानदेशात भिज पाऊस

जळगाव : खानदेशात गेले दोन दिवस अनेक भागात हलका ते मध्यम स्वरुपाचा पाऊस झाला आहे. मंगळवारी (ता.२७) जळगाव, धुळ्यात काही तास भिज पाऊसदेखील झाला. नवीन पेरणीसह पूर्वहंगामी कापूस पीक, केळी, भाजीपाला, उसासाठी हा पाऊस लाभदायी ठरणार आहे. 

गेल्या वर्षी खानदेशात सर्वत्र ७० टक्क्यांवर पाऊस जुलैच्या २० तारखेपर्यंत झाला होता. धुळ्यातील पाऊसमान सर्वाधिक होते. जळगाव जिल्ह्यात १५० टक्क्यांवर पाऊस झाला होता. यंदा मात्र पाऊसमान जूनमध्ये अत्यल्प होते. नंदुरबारात गेल्या पाच दिवसातच पाऊस झाला आहे. जून व जुलैच्या मध्यातही नंदुरबारात पाऊस नव्हता. तेथे कापूस, ज्वारी, सोयाबीन, उडीद, मुगाची पेरणी अपेक्षित क्षेत्रात होवू शकलेली नाही. पण तेथेही गेले पाच दिवस अधून-मधून चांगला पाऊस झाला आहे.

नंदुरबारात कमी पाऊसमान होते. पण तळोदा, शहादा भागात चांगला पाऊस झाला. धुळ्यात शिंदखेडा तालुक्यात कमी पाऊस झाला. गेले तीन-चार दिवस धुळ्यातील साक्री, धुळे, शिरपूर, जळगावमधील धरणगाव, एरंडोल, जळगाव, भुसावळ, यावल, पाचोरा, चोपडा या भागात बऱ्यापैकी पाऊस झाला. जळगाव तालुक्यात मंगळवारी २८ मिलीमीटर पाऊस पडला. एरंडोलातही चांगला पाऊस झाला. 

जळगाव जिल्ह्यात ६३ टक्के पाऊस झाला आहे. यात चाळीसगाव, पाचोरा भागात चांगला पाऊस झाला. पण जळगाव, चोपडा, अमळनेर, पारोळा भागात कमी पाऊसमान आहे. धुळ्यातही ५० टक्क्यांवर पाऊस झाला. नंदुरबारातील पाऊसही ५० टक्क्यांपर्यंत झाला आहे. गेल्या २४ तासात कुठेही अतिवृष्टी झालेली नसल्याची माहिती मिळाली. भिज पावसामुळे जमिनीतही पाणी जिरण्यास मदत झाली आहे.

जमीन खरडणे, माती वाहून जाणे, पिकांची हानी, असे प्रकारही गेल्या पाच-सहा दिवसातील पावसात अपवाद वगळता झालेले नाहीत. यामुळे भूगर्भातील पाण्याची पातळी वाढू शकणार आहे. नदी, नाल्यांना अद्याप चांगले प्रवाही पाणी आलेले नाही. गिरणा, पांझरा, गोमाई, सुसरी, अनेर आदी नद्यांना पूर आलेला नाही. फक्त तापी नदीला तीनदा चांगला पूर आला. तापी नदीवरील हतनूर धरणातून पाण्याचा विसर्ग सुरू आहे. धरणाच्या लाभक्षेत्रात पाऊस झाल्याने धरणात पाण्याची आवक कायम आहे. 

पाऊस (मिलीमीटरमध्ये) ः जळगाव - चोपडा २१, यावल १८, भुसावळ २२, जळगाव २८, एरंडोल ३१. धुळे - शिंदखेडा १८, साक्री २६.