नाशिक : किमान आधारभूत किंमत भरडधान्य योजनेअंतर्गत खरीप हंगाम २०२०-२१ साठी केंद्र सरकारने १५ लाख १८ हजार क्विंटल मका आणि २ लाख ५० हजार क्विंटल ज्वारी, तर ६० हजार क्विंटल बाजरी खरेदीसाठी राज्य सरकारला मान्यता दिली आहे, अशी माहिती अन्न, नागरी पुरवठा मंत्री छगन भुजबळ यांनी दिली.

खरीप हंगाम २०२०-२१साठी किमान आधारभूत किंमत भरडधान्य योजनेअंतर्गत ४४९०५ क्विंटल मका, ९५०० क्विंटल बाजरी व १५४३६ क्विंटल ज्वारी खरेदीसाठी केंद्र शासनाने राज्य सरकारला मान्यता दिलेली होती. महाराष्ट्र राज्य मार्केटिंग फेडरेशनमार्फत राज्यात १२२ व आदिवासी विकास महामंडळामार्फत ५२ खरेदी केंद्रांद्वारे भरडधान्य खरेदी सुरू करण्यात आली होती. 

पीक पद्धतीतील बदलांमुळे राज्यातील शेतकऱ्यांनी मोठ्या प्रमाणात मका आणि बाजरीचे उत्पादन घेतले आहे. त्यामुळे खरीप हंगाम २०२०-२१ साठी भारत सरकारने दिलेले ४.४९ क्विंटल मका आणि ९५०० बाजरी खरेदीचे उद्दिष्ट दिनांक १४ डिसेंबर २०२० रोजी पूर्ण झाल्यामुळे १५ डिसेंबरपासून मका आणि बाजरीची खरेदी बंद झालेली होती. 

मका, ज्वारी आणि बाजरीची खरेदी अजून बाकी राहिल्यामुळे १५ लाख क्विंटल मका, २ लाख ५० हजार क्विंटल ज्वारी आणि १ लक्ष ७ हजार क्विंटल बाजरी खरेदीचे उद्दिष्ट वाढवून देण्याची राज्याने केंद्र सरकारकडे मागणी केलेली होती.

खरेदी ३१ जानेवारी २०२१ पर्यंत सुरू राहणार 
मंत्री छगन भुजबळ यांनी किमान आधारभूत किंमत भरडधान्य योजनेअंतर्गत मका आणि बाजरीचे उद्दिष्ट वाढवून देण्यासाठी केंद्राकडे पाठपुरावा केला होता. सोमवारी (ता. ११) केंद्र सरकारने मका, ज्वारी आणि बाजरी खरेदीसाठी राज्याला उद्दिष्ट वाढवून दिल्यामुळे कोरडवाहू खरिपाची शेती करणाऱ्या शेतकऱ्यांना दिलासा मिळाला आहे. ही भरड धान्य खरेदी ३१ जानेवारी २०२१ पर्यंत सुरू राहणार आहे.