जळगाव ः उत्तर महाराष्ट्रात प्रसिद्ध असलेले खानदेशातील पशुधनाचे बाजार सुमारे ४० ते ४२ दिवसांपासून विस्कळीत झाले आहेत. शेतकऱ्यांना नव्या बैलजोड्या, दुभते पशुधन घेण्यासह विक्रीबाबत अडचणी येत आहेत. तर व्यापाऱ्यांकडील पशुधनही तसेच बांधून ठेवावे लागत आहे.
जळगाव जिल्ह्यात वरखेडी (ता. पाचोरा), नेरी (ता. जामनेर), सावदा (ता. रावेर), वैजापूर (ता. चोपडा), चोपडा, चाळीसगाव, फैजपूर (ता. यावल) येथील पशुधनाचा बाजार प्रसिद्ध आहे. धुळ्यातील धुळे, शिरपूर, नंदुरबारमध्ये शहादा, नंदुरबार येथील बाजार प्रसिद्ध आहे. परंतु हे सर्व बाजार महिनाभरापासून बंद आहेत. नवा हंगाम सुरू होणार आहे. त्यासाठी नव्या बैलजोड्यांची गरज अनेक शेतकऱ्यांना आहे. अनेक व्यापारी गोऱ्ह्यांचे संगोपन करून उमद्या बैलजोड्या तयार करतात.
तसेच अनेक शेतकऱ्यांना दुभते पशुधन हवे आहे. तर काहींना पशुधन अधिक झाल्याने त्याची विक्री करायची आहे. अशातच पशुधनाचे बाजार बंद आहेत. यामुळे कोट्यवधींची उलाढाल बंद आहे. पशुधन विक्रीअभावी व्यापारी, शेतकऱ्यांकडेच आहे. त्यामुळे वित्तीय उलाढाल बंद असून, बाजार समित्यांचा महसुलही कमी झाला आहे. खानदेशातील बाजारांमध्ये औरंगाबाद, जालना, नाशिक, मध्य प्रदेशातील शेतकरी, खरेदीदारदेखील येतात. परंतु बाजार बंद असल्याने शेतकरी, व्यापारी, खरेदीदार यांच्यासमोर अडचणी वाढत असल्याचे शेतकऱ्यांनी सांगितले.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.