धनगर समाज भाजपच्याच पाठीशी ः महादेव जानकर

सांगली  : मुख्यमंत्री देवेंद्र फडणवीस हेच धनगर समाजाला आरक्षण देऊ शकतात. भाजपमुळे धनगर समाजाला आरक्षण मिळणार आहे. त्यामुळे धनगर समाज भाजपच्याच पाठीशी असल्याचा दावा पशुसंवर्धन व दुग्धविकास मंत्री महादेव जानकर यांनी केला.

भाजप, शिवसेना महायुतीचे उमेदवार संजय पाटील यांच्या प्रचाराच्या निमित्ताने शुक्रवारी (ता १९) श्री. जानकर सांगलीत आले होते, त्या वेळी त्यांनी पत्रकारांशी संवाद साधला. या वेळी आमदार सुधीर गाडगीळ, माजी आमदार दिनकर पाटील, प्रदेश उपाध्यक्षा नीता केळकर, माजी आमदार रमेश शेंडगे आदी उपस्थित होते. 

मंत्री जानकर म्हणाले, की भाजप सरकार सत्तेत आल्यावर पहिल्याच मंत्रिमंडळ बैठकीत धनगर समाजाच्या आरक्षणाचा निर्णय घेणार होते. मात्र चळवळीत बोलताना संसदीय राजकारण कळत नाही. मुख्यमंत्री देवेंद्र फडणवीस यांनी आदिवासी आरक्षणाला धक्का न लावता सामाजिक, शैक्षणिक आणि आर्थिक आरक्षण दिले आहे. राजकीय आरक्षणाचा प्रश्‍न आहे. तो राज्य सरकारच्या हातात नसून केंद्राच्या हातात आहे. त्यावर न्यायालयात राज्य सरकारने प्रतिज्ञापत्र दाखल केले आहे. राज्य सरकारची समाजाला न्याय देण्याची इच्छा आहे. मुख्यमंत्री देवेंद्र फडणवीस यांनी प्रामाणिक प्रयत्न केले आहेत. त्यामुळे धनगर समाजाला आरक्षण मुख्यमंत्री फडणवीस आणि भाजपमुळेच मिळणार आहे.

ते म्हणाले, की कॉंग्रेस, राष्ट्रवादीचे सरकार वाईट होते असे म्हणणार नाही. मात्र, त्यांच्या काळात सामाजिक भागिदारी देण्याचा त्यांनी प्रयत्न केला नाही. शाहू, फुले, आंबेडकर यांचे नाव घेऊन काम करणाऱ्या आघाडी सरकारने शेळी मेंढी विकास महामंडळाला निधी दिला नाही. मात्र मी मंत्री झाल्यावर ५० कोटींचा निधी दिला. तसेच आता मुख्यमंत्री देवेंद्र फडणवीस यांनी एक हजार कोटींचा निधी दिला आहे. त्याचा शासन आदेश निवडणूक झाल्यावर निघेल.

पडळकरांवर ‘नो कॉमेंट’ बहुजन वंचित आघाडीचे उमेदवार गोपीचंद पडळकर हे पूर्वाश्रमीचे राष्ट्रीय समाज पक्षाचे कार्यकर्ते होते. आता विरोधात गेले आहेत. याबाबत मंत्री जानकर म्हणाले, की मी पक्षाचा राष्ट्रीय अध्यक्ष आहे. जे पक्षात नाहीत त्यांच्याबद्दल मी बोलणार नाही. मला मानणारा वर्ग समाजात आहे. आजही समाज माझ्याच मागे आहे.