नगर मतदारसंघात सहा उमेदवारांचे अर्ज बाद

नगर  : नगर लोकसभा मतदारसंघात ३१ उमेदवारांनी ३८ उमेदवारी अर्ज दाखल केले होते. शुक्रवारी झालेल्या छाननीत भाजप उमेदवार डॉ. सुजय विखे पाटील यांच्या पत्नी धनश्री विखे पाटील यांच्यासह सहा उमेदवारांचे अर्ज बाद झाले. आता या मतदारसंघात अर्ज माघारीनंतर लढतीचे चित्र स्पष्ट होणार आहे. 

नगर लोकसभा मतदारसंघासाठी एकूण ३१ इच्छुक उमेदवारांचे ३८ उमेदवारी अर्ज प्राप्त झाले होते. मतदारसंघाचे निवडणूक निर्णय अधिकारी तथा जिल्हाधिकारी द्विवेदी यांच्या कक्षात छाननीप्रक्रिया पार पडली. सहायक निवडणूक निर्णय अधिकारी अजय मोरे या वेळी उपस्थित होते. कोणाही उमेदवाराने एकमेकांच्या अर्जावर आक्षेप नोंदविले नाहीत.

डॉ. सुजय विखे पाटील यांनी व धनश्री विखे पाटील यांनी भारतीय जनता पक्षातर्फे उमेदवारी अर्ज दाखल केला. यापैकी डॉ. विखे यांचा उमेदवारी अर्ज मंजूर झाला, तर धनश्री विखे यांचा अर्ज अवैध ठरविला. पोपट दरेकर यांच्या अर्जावर दहा सूचकांच्या सह्या नसल्याने तो बाद ठरविण्यात आला. याच धर्तीवर जाकिर शेख यांचाही अर्ज अवैध ठरविला गेला.

भागवत गायकवाड यांनी नगर मतदारसंघासाठी उमेदवारी अर्ज दाखल केला; मात्र त्यांच्यासाठी स्वाक्षरी केलेले सर्व सूचक शिर्डी मतदारसंघातील रहिवासी असल्याने, गायकवाड यांचा अर्ज अवैध ठरविला गेला. विलास लाकूडझोडे यांनी उमेदवारी अर्जासाठी आवश्‍यक असलेली अनामत रक्कम न भरल्याने त्यांचा अर्ज अवैध ठरला. सुदर्शन शितोळे यांनी दोन उमेदवारी अर्ज दाखल केले होते. त्यांपैकी हिंदू एकता आंदोलन पक्षातर्फे भरलेला अर्ज शपथपत्र अपूर्ण असल्याने अवैध ठरविण्यात आला, तर अपक्ष म्हणून दाखल केलेला दुसरा अर्ज वैध ठरला.

यामुळे नगर लोकसभा मतदारसंघासाठी उमेदवारी अर्ज दाखल केलेल्या ३१ व्यक्तींपैकी पाच व्यक्ती अर्ज अवैध ठरल्याने निवडणूक प्रक्रियेतून बाहेर पडल्या आहेत. अर्ज मागे घेण्याची अंतिम मुदत सोमवारी (ता. ८) दुपारी तीन वाजेपर्यंत आहे.