चाकूर तालुक्यात गारपीटीने पिके, भाजीपाल्याचे नुकसान

चापोली, जि. लातूर : चाकूर तालुक्यातील धनगरवाडी व अजनसोंडा शिवारात सोमवारी (ता.६) सायंकाळी साडे पाच वाजण्याच्या सुमारास वादळी वाऱ्यासह गारपीट झाली. यामध्ये शेतातील उभे पीक व भाजीपाल्यांचे अतोनात नुकसान झाले.
 loss of crops, vegetables due to heavy rain in Chakur taluka
loss of crops, vegetables due to heavy rain in Chakur taluka

चापोली, जि. लातूर : चाकूर तालुक्यातील धनगरवाडी व अजनसोंडा शिवारात सोमवारी (ता.६) सायंकाळी साडे पाच वाजण्याच्या सुमारास वादळी वाऱ्यासह गारपीट झाली. यामध्ये शेतातील उभे पीक व भाजीपाल्यांचे अतोनात नुकसान झाले. शेतकऱ्यांना मोठा आर्थिक फटका बसला आहे. 

धनगरवाडी व अजनसोंडा येथील काही प्रगत शेतकरी पारंपारिक पिकासोबतच भाजीपाला पिकाचीही लागवड करतात. ‘कोरोना’मुळे सध्या बाजारपेठ बंद आहे. त्यामुळे भाजीपाला शेतातच सडत आहे. त्यातही काही शेतकरी मिळेल त्या दरात व्यापाऱ्यांना व स्वतः ग्राहकापर्यंत जाऊन विक्री करीत आहेत. मात्र, सोमवारी झालेल्या गारपीटमुळे शेतकऱ्यांच्या हातातोंडाशी आलेला घास निसर्गाने हिरावला. 

धनगरवाडी येथील शेतकरी शेषेराव कोरे यांनी जानेवारी महिन्यात एक एकरवर टोमॅटो लागवड केली होती. त्यासाठी त्यांना साधारण एक लाख रुपयांचा खर्च आला. मंगळवारी (ता.७) ते पहिला तोडा करणार होते. त्यासाठी व्यापाऱ्याला सौदाही केला होता. मात्र, सोमवारी रात्रीच गारपीटने होत्याचे नव्हते केले. तोडणीस आलेले टोमॅटो खराब झाले. झाडे भुईसपाट झाली. आता खर्चही निघेल, अशी आशा राहिली नाही. याशिवाय एक एकरवर मिरचीचेही नुकसान झाले, असे कोरे यांनी सांगितले. 

येथीलच पंडित कोरे यांनी दोन एकर टोमॅटो, दहा गुंठे काकडी, दहा गुंठे कारले, एक एकर भेंडी, लागवड केली आहे. मात्र गारपीटमुळे त्याचे नुकसान झाले. दिवसरात्र एक करून मोठ्या मेहनतीने भाजीपाल्याचे संगोपन केले. मात्र, एका रात्रीतच होत्याचे नव्हते झाले. नुकसानीचे तात्काळ पंचनामे करावे, या आर्थिक अडचणीत सापडलेल्या शेतकऱ्यांना योग्य न्याय देऊन मोबदला द्यावा, अशी मागणी धनगरवाडी व अजनसोंडा येथील शेतकऱ्यांनी केली.   

Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.

ताज्या कृषी घडामोडींसाठी फेसबुक, ट्विटर, इन्स्टाग्राम टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.

Related Stories

No stories found.
Agrowon
agrowon.esakal.com