सिंधुदुर्गात अतिवृष्टीने महावितरणचे चार कोटी २८ लाखांचे नुकसान

सिंधुदुर्ग : जिल्ह्यात झालेल्या अतिवृष्टी आणि वादळाचा महावितरणला मोठा फटका बसला आहे. एक हजार १२६ वीजखांब कोसळले आहेत. ६५ रोहित्रांचे यामध्ये नुकसान झाले आहे. गेल्या दहा दिवसांत महावितरणचे ४ कोटी २८ लाख रुपयांचे नुकसान झाले आहे.

जिल्ह्यात ४ ते ८ ऑगस्ट या कालावधीत वादळीवाऱ्यांसह अतिवृष्टी झाली. तिचा मोठा फटका महावितरण कंपनीला बसला आहे. वादळ आणि मुसळधार पावसामुळे जिल्ह्यात वीज वितरणची सेवा पुरती कोलमडून गेली होती. अनेक भागांतील विद्युतपुरवठा खंडित झाला होता. वादळामुळे जिल्ह्यातील १ हजार १२६ वीजखांब कोसळून पडले. यामध्ये उच्च दाबाचे २९८ आणि लघू वाहिन्यांच्या ९३८ वीज खांबांचा समावेश आहे. 

याशिवाय उच्चदाबाच्या २६.१२ कि.मी अतंरावरील वीजवाहिन्या तुटुन पडल्या. कमी दाबाच्या ८० किलोमीटर अतंरावरील वाहिन्या तुटल्या.

पुराच्या पाण्यामुळे १६ रोहित्रे कोसळली, तर ६५ रोहित्रे नादुरूस्त झाली. सर्वाधिक नुकसान दोडामार्ग, सांवतवाडी, कुडाळ, वैभववाडी आणि कणकवली तालुक्यात झाले. अतिवृष्टी आणि वादळामुळे महावितरणचे गेल्या दहा दिवसांत ४ कोटी २८ लाख रुपयांचे नुकसान झाले.