जत तालुक्यात गारपिटीमुळे द्राक्ष बागांचे नुकसान 

सांगली : जत तालुक्यातील पूर्व बिरुळ, जिरग्याळ या भागात शनिवारी (ता. १८) सायंकाळी झालेल्या वादळी वाऱ्यासह गारपिटीमुळे द्राक्ष बागेचे मोठ्या प्रमाणात नुकसान झाले आहे. तसेच पावसाने बेदाणा ३० ते ४० टक्के भिजला आहे. त्यामुळे बळीराजा संकटात सापडला आहे. 

जत तालुक्याच्या पूर्व भाग हा बेदाणा उत्पादनासाठी अग्रेसर आहे. या भागात १५० हून अधिक बेदाणा शेड आहेत. त्यामुळे द्राक्षाची काढणीचे नियोजन शेतकरी करत आहेत. बेदाणा तयार करण्याची लगबग सुरू आहे. या भागात अजून २० ते २५ टक्के द्राक्षाची काढणी शिल्लक आहे. 

शनिवारी (ता. १८) अचानक सायंकाळी उमदी, बिरुळ, वज्रवाड, जिरग्याळ, तिकुंडी, खिलारवाडी गावात वादळीवाऱ्यांसह पावसाने हजेरी लावली. त्यानंतर गारपीट झाली. त्यामुळे काढणीला आलेल्या द्राक्षांना त्याचा फटका बसला आहे. यामुळे सुमारे २५० एकरांवरील द्राक्ष बाधित झाली आहेत. बेदाणा भिजल्याने नुकसान झाले असून बेदाणा काळा पडण्याची शक्यता आहे. 

मिरज तालुक्यातील सोनी गावात देखील गारपिट झाली. सध्या सोनी परिसरात आगाप द्राक्षाची खरड छाटणी घेतली होती. द्राक्षाला फुटवा फुटला होता. गारपिट झाल्याने नवीन आलेली पालवी, डोळे गारांच्या माराने बाधित झाल्याने पुन्हा छाटणी घ्यावी लागणार आहे. 

जत पूर्व भागात दोन ते तीन दिवसांतून पाऊस पडत आहेत. रात्रीचा पाऊस येत आहे. त्यामुळे द्राक्ष बाधित झाली आहेच. त्याचबरोबर बेदाणा नुकसान अधिक झाले असून काळा पडू लागला आहे. शासनाने पंचनामे करून मदत करावी.  - रोहिदास सातपुते, उमदी, ता. जत.