नांदेड : परतीच्या पावसाने सोयाबीनचे नुकसान

नांदेड ः नांदेड जिल्ह्यात परतीच्या पावसामुळे काढणी सुरू असलेल्या सोयाबीन, वेचणीस आलेल्या कापसाचे अतोनात नुकसान झाले आहे. पाऊस सुरू असल्यामुळे अनेक मंडळांमध्ये रब्बीची पेरणी लांबणीवर पडली आहे. नांदेड जिल्ह्यात शुक्रवारी (ता. ११) सकाळी आठपर्यंतच्या २४ तासांमध्ये नायगाव मंडळात सर्वाधिक १५१ मिलिमीटर पाऊस झाला.

नायगाव, नरसी, मांजरम, खानापूर, शहापूर, पेठवडज या सहा मंडळांमध्ये अतिवृष्टी झाली. अनेक मंडळांमध्ये रात्रभर पाऊस सुरू असल्यामुळे शेतातील कापणी केलेल्या सोयाबीन पिकामध्ये पाणी साचून नुकसान झाले.

नांदेड जिल्ह्यातील ८० पैकी ४१ मंडळांमध्ये हलक्या ते जोरदार पाऊस झाला. नायगावसह धर्माबाद, बिलोली, देगलूर या सीमावर्ती भागातील तालुक्यासह मुखेड, कंधार, लोहा, उमरी तालुक्यांतील अनेक मंडळांमध्ये विजांच्या कडकडाट जोरदार पाऊस झाला. कापणी केलेले सोयाबीन, बोंडातून फुटून वेचणीस आलेला कापूस, खोलगट भागातील जमिनीमध्ये पाणी साचल्याने कपाशी, तूर आदी पिकांचे नुकसान झाले. 

परभणी जिल्ह्यातील गंगाखेड आणि बनवस मंडळांमध्ये पाऊस झाला. नांदेड, परभणी जिल्ह्यांतील अनेक मंडळांमध्ये पाऊस सुरू असल्यामुळे सोयाबीनच्या सुगीच्या कामात अडथळे येत आहेत. रब्बीच्या पेरणी लांबणीवर पडली  आहे.

मंडळनिहाय पाऊस (मिलिमीटरमध्ये)  नांदेड जिल्हा ः नायगाव १५१, नरसी ९३, मांजरम ७१, बरबडा ५४, कुंटूर ५२, धर्माबाद ४०, जारिकोट ४२, करखेली १७, बिलोली ३५, आदमपूर २७, लोहगाव ६०, सगरोळी ४०, कुंडलवाडी ५५, देगलूर ५८, खानापूर ७५, शहापूर ७०, मरखेल २२, मालेगाव २२, हानेगाव ४५, मुखेड ५८ जांब ४५,  येवती ५०, जाहूर ४२, चांदोला ५२, मुक्रमाबाद २७, बाऱ्हाळी २७, कंधार ४५, कुरुला ३०, उस्माननगर १६, बारुळ ४, पेठवडज ८०, फुलवळ ३८,  लोहा ११, माळाकोळी ९, कलंबर ३५, कापशी १५, सिंदी ६, गोळेगाव २५.