खानदेशात ई पीक पाहणीला शेतकऱ्यांचा कमी प्रतिसाद

जळगाव : खानदेशातील सुमारे तीन हजार पाडे, महसुली गावांपैकी निम्मेदेखील गावांनी ई पीक पाहणी कार्यक्रमात सहभाग घेतलेला नाही. परिणामी, सातबाऱ्यावर पीक पेरा नोंदी झालेल्या नाहीत. या कार्यक्रमातून पीक पेरा नोंदीसाठी मुदतवाढ देण्याची वेळ आली आहे. मोठे क्षेत्र पीक पेरा नोंदीअभावी पडीक दिसत आहे. 

१५ ऑगस्टपर्यंत पीक पेरा नोंदी केल्या जात होत्या. परंतु यंदा ई पीक पाहणी या अॅण्ड्रॉईड मोबाईल अॅपद्वारे शेतकऱ्यांना आपल्या पीक पेऱ्याची नोंद ऑनलाइन करायची आहे. एका मोबाईलच्या मदतीने २० खात्यांवरील पीक पेरा नोंद शक्य आहे. परंतु तांत्रिक अडचणी, उदासीनता व शासनाबाबत नाराजी, यामुळे अनेक शेतकरी या ई पीक पाहणी कार्यक्रमात सहभागी झालेले नाहीत.

ई पीक पाहणी अॅप डाऊनलोड करणेच अनेक शेतकरी टाळत आहे. निरक्षर शेतकरी पीक पेरा नोंदीसाठी तलाठी कार्यालयात जात आहेत. परंतु तलाठीद्वारे पीक पेरा नोंदणीसंबंधीची कार्यवाहीच पोर्टलवर होत नसल्याची स्थिती आहे. या मुळे या कार्यक्रमाचा फज्जाच जणू झाला आहे. 

मोठे क्षेत्र नापेर किंवा पीक पेऱ्याविना दिसत आहे. जमिनी पडीक दिसत आहेत. यामुळे यंदा पिकांचे नुकसान होऊनही पंचनामे करणे प्रशासन टाळत असल्याचे दिसत आहे, असे शेतकऱ्यांचे म्हणणे आहे. यामुळे या तलाठीद्वारे पीक पेरा नोंदी सुरू कराव्यात, अशी मागणी शेतकरी करीत आहेत. 

जळगाव जिल्ह्यात सुमारे १५०० महसुली गावे आहेत. पैकी ५०० गावेदेखील या कार्यक्रमात १०० टक्के सहभागी झालेले नाहीत. काही गावांमधून, तर एकाही शेतकऱ्याने पीक पेऱ्याची नोंदणी ई पीक पाहणी कार्यक्रमातून केलेली नसल्याचेदेखील वास्तव समोर आले आहे. यामुळे हा कार्यक्रम अपयशी झाला आहे. जमिनी पोर्टलवर पडीक दिसत आहेत. ऑक्टोबरमध्ये रब्बी हंगाम सुरू होईल. 

शेतकरी नैसर्गिक समस्येमुळे संकटात आहेत. त्यात ई पीक पाहणी, अॅप, मोबाईल या बाबी शेतकऱ्याला परवडणाऱ्या नाहीत. तलाठी पीक पेरा का नोंदवीत नाही, हा प्रश्न आहे. ई पीक पाहणी सुरू ठेवा, पण तलाठ्यालादेखील पीक पेरा नोंदीचे अधिकार पोर्टलवर बहाल करा. - रामभाऊ मराठे, शेतकरी, जामनेर (जि.जळगाव)