निम्न दुधानाचे बुधवारपासून आवर्तन

परभणी  : जिल्ह्यातील ब्रम्हवाकडी (ता. सेलू) येथील निम्न दुधना प्रकल्पाच्या धरणातून यंदाच्या (२०२०-२१) यंदाच्या रब्बी हंगामात तीन पाणी आवर्तने सोडण्याचे नियोजन आहे. त्यानुसार शेतकऱ्यांनी पीक नियोजन करावे. पहिले आवर्तन बुधवार (ता. २) ते मंगळवार (ता. १५) या कालावधीत सोडण्यात येणार आहे. लाभक्षेत्रातील गरजू पाणी मागणी अर्ज सादर करावेत, असे आवाहन माजलगाव कालवा विभाग क्रमांक दहा, परभणी, जालना पाटबंधारे विभागाचे कार्यकारी अभियंता यांनी केले आहे. पाणलोट क्षेत्रात झालेल्या जोरदार पावसामुळे यंदा निम्न दुधना प्रकल्पांमध्ये शंभर टक्के पाणीसाठा उपलब्ध आहे. नुकत्याच जिल्हाधिकारी कार्यालयात द्रकश्राव्य  माध्यमाद्वारे  पार पडलेल्या कालवा सल्लागार समितीच्या शासकीय सदस्यांच्या प्राथमिक बैठकीतील निर्देशानुसार तसेच लाभक्षेत्रातील शेतकऱ्यांची मागणी लक्षात घेऊन निम्न दुधना प्रकल्पातून प्रत्यक्षात पहिले आवर्तन बुधवारपासून (ता.२) सोडण्यात येईल. इतर पाणी आवर्तनांचे नियोजन कालवा सल्लागार समितीच्या मुख्य बैठकीमधील  निर्णयाच्या अधीन राहून करण्यात येईल.

अटी, शर्थीचे पालन करण्याचे आवाहन पहिल्या आवर्तनामध्ये डावा, उजवा कालवा, शासकीय उपसा सिंचन योजनांद्वारे पाणी सोडण्यात येईल. लाभधारकांनी शक्य असेल तेथे प्रवाही पद्धतीने किंवा उपशाद्वारे  पाणी घ्यावयाचे आहे. त्यासाठी गरजू लाभधारकांनी पाणी मागणी अर्ज (नमुना ७ अ) मध्ये पीक क्षेत्राची नोंद करून परिपूर्ण अर्ज तत्काळ माजगाव कालवा क्रमांक १० अंतर्गंत संबंधित उपविभागांत सादर करावेत. त्या ठिकाणी पाणी मागणी अर्ज विनामूल्य उपलब्ध आहेत. कालवा बंद, कालवा सुरू कालावधी यामध्ये बदल करण्याचे  अधिकार कार्यकारी अभियंता यांना आहेत. मागणी केलेल्या लाभधारक शेतकऱ्यांना चालू हंगामात कालव्याचे पाणी घेतलेल्या पिकाची पाणी पट्टी भरावी लागले. पिकांचे मागणी क्षेत्र २० गुंठेच्या पटीत असावे. मंजूर उपसा सिंचन योजना धारकांनी (कालवा, नदी, नाले) पाणी अर्ज मंजूर करून घेऊनच उपसा सिंचनासाठी पाणीवापर करावा. अर्जासोबत सिंचन परवानगीची प्रत जोडावी. जलाशय उपसा शासकीय मंजूर उपसा योजनांमधूनच करण्यात यावा. पाणी वाया घालवू नये, असे आवाहन ही विभागाकडून करण्यात आले आहे.