नागपूर : मध्यप्रदेशात झालेल्या पावसामुळे या हंगामात सोयाबीन दरात सुधारणेची शक्यता वर्तविली जात आहे. सोयाबीन दर चार हजारांचा टप्पा पार करतील, अशी अपेक्षा आहे. सध्या कळमणा बाजार समितीत ३६०० ते ३८६४ रुपये दराने सोयाबीनचे व्यवहार होत आहेत. बाजारातील जुन्या सोयाबीनची आवक १५० क्‍विंटलवर पोचली आहे.
मध्यप्रदेश सोयाबीनचे हब म्हणून ओळखले जाते. परंतु, यावर्षी संततधार व अतिवृष्टीच्या पावसाचा फटका या भागातील सोयाबीन उत्पादकांना बसला आहे. तेथील उत्पादकता घटल्याने इतर राज्यांत सोयाबीन दरात तेजीची शक्यता वर्तविली जात आहे. बाजार समितीत नव्या सोयाबीनची सध्या आवक झालेली नाही. जुन्या सोयाबीनची देखील अवघी १५० क्‍विंटलची आवक आहे. ३६०० ते ३८६४ रुपये दराने याचे व्यवहार होत आहेत.
बाजारात सरबती गव्हाचे दर २५०० ते २७०० रुपये क्‍विंटलवर स्थिर आहेत. गव्हाची रोजची सरासरी आवक २०० क्‍विंटलची आहे. हरभरा आवक ४५० क्‍विंटलची असल्याचे व्यापारी सूत्रांकडून सांगण्यात आले. हरभऱ्याला ३६५० ते ४२११ रुपये क्‍विंटलचा दर मिळाला आहे. तुरीची आवकदेखील केवळ ५० क्‍विंटलची असून ४९२१ ते ५३४१ रुपयाने तुरीचे व्यवहार होत आहेत. संत्र्याची आवक १३ क्‍विंटलची, तर दर २००० ते ३००० रुपये क्‍विंटलचे होते. मोठ्या आकाराच्या मोसंबीची ६०० क्‍विंटलची आवक, तर दर ३८०० ते ४५०० रुपये असल्याचे सांगण्यात आले.
बाजारातील केळीची आवक ६२ क्‍विंटलवर पोचली आहे. ४५० ते ५५० रुपये क्‍विंटलवर केळीचे दर स्थिर आहेत. डाळिंबाचे दर २००० ते ७००० रुपये क्‍विंटलचे असून आवक १००५ क्‍विंटलवर पोचली आहे. बाजारात बटाट्याची लगतच्या मध्यप्रदेशातील छिंदवाडा भागातून आवक होत असल्याची माहिती व्यापाऱ्यांनी दिली. त्यांची आवक ४५७० क्‍विंटलची असून ८०० ते १३०० रुपयांवर दर स्थिर आहेत. लाल कांद्याची आवक १००० क्‍विंटल, तर दर २००० ते ३३०० रुपये क्‍विंटलचे आहेत. पांढरा कांदा आवक १६६९ क्‍विंटलची, तर दर ३००० ते ४२०० रुपये क्‍विंटलचे होते.
लसून दरातही तेजी आली असून ७००० ते १०००० रुपये क्‍विंटलने त्याचेच व्यवहार होत आहेत. आवक ३५६ क्‍विंटलची आहे. वाळलेल्या मिरचीचे दरही तेजीत आहेत. ७००० ते १०००० रुपयाने वाळलेल्या मिरचीचे व्यवहार होत आहेत. आवक २५१ क्‍विंटलची आहे. टोमॅटो दर ८०० ते १२०० रुपये क्‍विंटलवर स्थिर, तर आवक १४० क्‍विंटलची आहे. भेंडीची आवक १५० क्‍विंटलची, तर दर १५०० ते २००० रुपयांचे आहेत. गवार शेंगा १५०० ते २००० रुपये क्‍विंटल आणि आवक १४५ क्‍विंटलची होती.
हिरव्या मिरचीला १४०० ते १८०० रुपये क्‍विंटलचा दर आणि आवक १३० क्‍विंटलची होती. कारली २२०० ते २६०० रुपये क्‍विंटल आणि आवक १४२ क्‍विंटलची असल्याचे सांगण्यात आले. कोबीची १५० क्‍विंटलची आवक आणि दर १००० ते १५०० रुपये क्‍विंटल होते. पालकाचे दर २८०० ते ३००० रुपये क्‍विंटल आणि आवक ७० क्‍विंटलची होती. लिंबांचे दर ५००० ते ६००० रुपये क्‍विंटल आणि आवक ९० क्‍विंटलची होती.
Read the Latest Agriculture News in Marathi & Watch Agriculture videos on Agrowon. Get the Latest Farming Updates on Market Intelligence, Market updates, Bazar Bhav, Animal Care, Weather Updates and Farmer Success Stories in Marathi.
ताज्या कृषी घडामोडींसाठी फेसबुक, ट्विटर, इन्स्टाग्राम , टेलिग्रामवर आणि व्हॉट्सॲप आम्हाला फॉलो करा. तसेच, ॲग्रोवनच्या यूट्यूब चॅनेलला आजच सबस्क्राइब करा.