मढी यात्रेला बुधवारपासून प्रारंभ

नगर ः होळीच्या दिवशी सकाळी कानिफनाथांच्या समाधीला व गडाच्या कळसाला कैकाडी समाजाची मानाची काठी टेकवल्यानंतर भटक्‍यांच्या पंढरीतील मढी यात्रेला सुरवात होते. होळी पेटविण्याचा मान गोपाळ समाजाला असतो. यात्रेला बुधवारी (ता. २०) सुरवात होत आहे. होळीच्या दिवशी कैकाडी समाजाचे मानकरी नारायणबाबा जाधव व नाथभक्त पाथर्डीतून कानिफनाथांची मानाची काठी वाजतगाजत मढीला पायी नेतात.  मढी येथे कैकाडी समाजबांधवांचा देवस्थानातर्फे गौरव करण्यात येतो. गडाच्या कळसाला काठी टेकविल्यानंतर यात्रेला प्रारंभ होतो. होळी ते गुढीपाडवा, असा पंधरा दिवस यात्रोत्सव चालतो. संत कानिफनाथांच्या समाधीचा दिन (रंगपंचमी) यात्रेचा प्रमुख दिवस समजला जातो. भटक्‍या समाजातील विविध जातिधर्मांचे लोक येथे येतात. आता जातपंचायती बंद झाल्या. वैदू, गोपाळ, जोशी, कोल्हाटी, कैकाडी, रंगारी व विविध भटक्‍या समाजाचे हे प्रमुख श्रद्धास्थान आहे. यात्रेला राज्यभरातून व आंध्र प्रदेश, तमिळनाडू, तेलंगणातून नाथभक्त मढीत येतात. मरकड व ग्रामस्थांना पूजेचा मान आहे.  प्रांताधिकारी देवदत्त केकाण यांच्या अध्यक्षतेखाली बैठक घेऊन विविध खात्यांच्या अधिकाऱ्यांना जबाबदारी दिली आहे. एसटी, वीज वितरण, सार्वजनिक बांधकाम विभाग, पोलिस, पंचायत समिती, आरोग्य विभागांना दिलेल्या कामांची अंमलबजावणी काटेकोरपणे करण्यासाठी तहसीलदार, पोलिस निरीक्षक व देवस्थान समितीचे सर्व विश्वस्त त्यांना मदतीचा हात देणार आहेत. एकेरी वाहतूक, पिण्याचे पाणी, पोलिस बंदोबस्त यांचे नियोजन केले आहे.