महात्मा फुले कृषी विद्यापीठाचे कुलसचीव कासार पदमुक्त 

नगर ः महात्मा फुले कृषी विद्यापीठाचे कुलसचीव सोपान कासार यांचा पदभार अखेर सोमवारी(ता.२०) काढून घेत त्यांना कुलुगुरु डॉ. के. पी. विश्वनाथा यांनी पदमुक्त केले. कासार यांचा तात्पुरता पदभार अण्णासाहेब शिंदे कृषी अभियांत्रिकी व तंत्रज्ञान महाविद्यालयाचे सहयोगी अधिष्ठाता डॉ. दिलीप पवार यांच्याकडे देण्यात आला आहे.  महसुल खात्यात उपजिल्हाधिकारी दर्जाचे अधिकारी असलेले सोपान कासार यांनी नगर येथे पुरवठा अधिकारी म्हणून काम केलेले आहे. त्यांची महात्मा फुले कृषी विद्यापीठाच्या कुलसचीवपदी एक वर्षासाठी नियुक्ती झाली होती. २९ फेब्रुवारी २०१९ रोजी त्यांनी पदभार घेतला होता. त्यानंतर त्यांच्या एक वर्षाच्या नियुक्तीचा कालावधी पुर्ण झाला होता. त्यांना मुदतवाढ द्यावी याबाबत कुलगुरुंनी राज्याच्या कृषी विभागाच्या सचीवांना प्रस्ताव दिला होता. मात्र त्यावर अजून कोणतेही उत्तर कृषी विभागाकडून विद्यापीठाला मिळाले नाही.  दरम्यान, सोमवारी कुलगुरु डॉ. विश्वनाथा यांनी कासार यांनी पदमुक्त करत त्यांचा पदभार डॉ. पवार यांच्याकडे तात्पुरता दिला. सोपान कासार गेल्या वर्षभरात वेगवेगळ्या कारणाने चर्चेत आले होते.