नाशिक जिल्ह्यात आधारभूत भरडधान्य खरेदीतील मका, ज्वारीच्या नोंदी प्रलंबीतच

नाशिक : जिल्ह्यात ८ खरेदी केंद्रांवर आधारभूत भरडधान्य खरेदीत मका व ज्वारी खरेदी करण्यात आली. ज्यामध्ये १ लाख ८९६ क्विंटल मका खरेदी पूर्ण झाली आहे. त्यापैकी पोर्टलवर ९७,२१९ क्विंटल मका खरेदीची नोंदणी पूर्ण झाली. मात्र, ३,६७७ क्विंटल मका खरेदी होऊनही त्याची नोंद पोर्टल बंद झाल्याने होऊ शकलेली नाही. यामुळे पैसे मिळणे तर दूरच; मात्र अद्याप पोर्टलवर नोंदणी न झाल्याने खरेदीची स्थिती अधांतरीच आहे.

याबाबत जिल्हा विपणन अधिकारी कार्यालयाने पोर्टलवर नोंदणीविना खरेदी केलेला मका नोंदणी करावा, यासाठी राज्य सरकारकडे प्रस्ताव सादर केला आहे. मात्र, अद्याप त्यावर निर्णय झाला नसल्याचे सूत्रांनी सांगितले. यासह जिल्ह्यात शासकीय आधारभूत खरेदीत एकूण ७८७.५० क्विंटल ज्वारी खरेदी झाली आहे. त्यापैकी पोर्टलवर ५१० क्विंटलची नोंद झाली. मात्र, २७७.५० क्विंटल नोंद झालेली नाही. त्यामुळे हा एक वेगळा अडचणीचा मुद्दा ठरत आहे.

अगोदरच अटी, शर्ती असल्याने शेतकऱ्यांना अडचणींचा सामना करावा लागला. भांडवल नसल्याने एकीकडे बँका पीककर्ज वेळेवर देत नसल्याने उसनवारी, सावकारी कर्ज घेऊन काहींनी हंगाम उभा केला. त्यातच पेमेंट देण्यात शासकीय यंत्रणेकडून होत असलेली अडचण डोकेदुखी ठरत आहे. 

अशी आहे स्थिती