मका विक्रीचे चुकारे ४० दिवसांनंतरही थकित

जळगाव ः जिल्ह्यातील सुमारे साडेतीन हजार मका उत्पादकांचे सुमारे ३१ कोटी रुपये शासनाकडे अडकले आहेत. शेतकरी आर्थिक संकटात असतानाच शासनाकडून मका खरेदीसंबंधीचे चुकारे अदा केले जात नसल्याने शेतकऱ्यांमध्ये नाराजी आहे. सुरुवातीला ११ कोटी रुपये जिल्ह्यात मका, ज्वारी खरेदीसंबंधीचे चुकारे अदा करण्यासाठी प्राप्त झाले. या निधीचे वितरण झाले. जिल्ह्यात सुमारे साडेचार हजार शेतकऱ्यांकडून मक्याची खरेदी झाली आहे. सुमारे दोन लाख क्विंटल मका खरेदी झाली आहे. तर सुमारे ७५ हजार क्विंटल ज्वारीची खरेदी केली आहे. यातील सुरुवातीला ज्या शेतकऱ्यांनी मका, ज्वारीची विक्री शासकीय केंद्रात केली, त्यांचेच चुकारे प्राप्त झाले. उर्वरित शेतकऱ्यांचे चुकारे प्राप्त झालेले नाहीत. खरेदीनंतरची बिले व इतर माहिती खरेदी केंद्रातून शासनाच्या पोर्टलवर भरण्यात आली आहे. स्थानिक मार्केटींग फेडरेशनच्या कार्यालयानेदेखील माहिती शासनाला किंवा मुंबई येथील वरिष्ठ कार्यालयास सादर केली आहे. परंतु चुकारे अदा होत नसल्याने शेतकऱ्यांमध्ये नाराजी आहे.  मका विक्री करून ४० ते ४५ दिवस झाले तरीदेखील चुकारे प्राप्त होत नसल्याचे शेतकऱ्यांचे म्हणणे आहे. याबाबत दोन-तीनदा संबंधित खरेदी केंद्राशी अनेक शेतकऱ्यांनी संपर्क साधला. आपली अडचण सांगितली. तसेच बँकेतही संपर्क साधला. परंतु समाधानकारक उत्तर मिळत नाही. शासकीय केंद्रात मक्याची विक्री केली आणि अडचण उभी करून घेतली, असा मनस्ताप काही शेतकरी करीत आहेत. यात मार्केटींग फेडरेशननुसार पुढील आठवड्यात सुमारे ५० हजार क्विंटल मका खरेदीसंबंधीचे चुकारे अदा केले जातील. निधी प्राप्त झाला आहे. त्याचे वितरण लवकरच सुरू होईल.